Shillong, Nailar 06:
Ka Village Health Council Ladmawrong ka la pynkut noh ïa ka ‘Catch em Young 100 & 60 meter race’ ha kaba ïadon lang u Bah R. Kharkrang, Chairman jong ka Umsaitsning Dorbar Pyllun kum u kongsan.
Ha kane ka jingïakob la wan shim bynta da ki khynnah kynthei bad shynrang kiba 16 bad hapoh 12 snem rta na kylleng ka thaiñ Umsning.
Ki khynnah shynrang 16 snem ka rta kiba la khur ïa ka jingjop ki long u Mac Bryan ke Pathaw, ba-ar u Lamlangki Makri bad balai la ïoh da u Sanbok Jyrwa. Ha ka liang ki kynthei la khur jingjop da ka E. Grace Malieh, ba-ar ka Anjusefin Syngkli bad ïa ka kyrdan balai la ïoh da ka Ribhaiaakor.
Ha ka liang ki khynnah shynrang kiba hapoh 12 snem ïa ka kyrdan ba nyngkong la jop da u Bhaboklang Syiemlieh, ba-ar u Favio Kharlyngnai bad balai la ïoh da u Aaron E. Marbaniang. Ha ka liang ki kynthei la khur jingjop da ka Jessina Marweiñ, ba-ar ka Bahunlang bad ka kyrdan balai ka leit sha ka Felicia Mawphniang.
Ha katei ka sngi la ïadon lang ki dkhot jong ka VHC Ladmawrong bad la ïoh ruh ki jingkren na u Chairman ka VHC u Bah Frankie Nongrum ryngkat ka jingbatai ïa ka working’s calendar jong u snem 2023-24 jong ka VHC da kaba ai khublei ïa i Dr. Sohkhia, Incharge jong ka Umsning CHC kiba ai ka kti kamon kti ka diang ban ïarap ïa ki prokram bapher bapher jong ka Health Council bad ha ka juh ka sngi la ïoh ban sam da ki Bicycle da u Chairman ka Umsaitsning Pyllun sha ki nongjop kiba wan nyngkong bud pat sa da ki song pisa sha ki wan ba-ar bad balai
Shuh shuh u Chairman u la pynbna ruh ba shibun kị prokram ïalehkai kiba kin dang pynïaid na ka bynta ban ïarap bad ïada ïa ki khynnah ban lait ne ngop ha ki kam bym dei bad ki jingdih ba sniew.
