Washington, Nailar:
Ka ïingbishar jong ka nongbah Texas ha ka Sngi Thohdieng ka la weng noh shipor ia ka jingkhang pyrshah ia ki kynthei ban pynhap khun tang na ka bynta kito kiba donkam kyrkieh bad ki bym lah shuh ban kiar.
Ka nongbishar, Judge Jessica Mangrum ha ka jingthoh ba ka la phah, ka la ong ba ki kynthei hapoh ka ri ki la shah pynslem shisha haba iadei bad ka jingshim rai halor ka ban khang ne ba yn shah ia ka jingpynhap khun hapoh ka ri.
La ong ruh ba ki doktor kim dei ban shah pynngat ha ki bor ka aiñ lada ki leh ia katei ka kam, namar ki hap ban peit thuh bad sngap thuh ia ka jingeh jong ki kynthei hynrei ki dei ban leh ia kane tang haba don ka lad hynrei ym pat ba kan ktah ia ka koit ka khiah ne ka jinglong jingman jong ka met ki kynthei.
Katei ka jingpynsangeh ba shipor ia ka aiñ ban khang ia ka jingpynhap khun, kan treikam beit shwa mynta shipor katba kim pat lah ban pyndep ne shim rai haba iadei bad kane ka mat, ia kaba la khmih lynti ba yn sa shim ia ka rai ba khatduh haduh u Lber jong u snem ban wan.
Na ka liang ki paidbah nongshong shnong, khamtam ki kynthei, ki la pynpaw ka jingsngewsih halor ka jingshah khang jongki ha katei ka bynta bad ka long ruh kumba la knieh noh ia ka hok jongki.
