Nongstoiñ, Nailar 06:
Ka lympung ïalehkai “38th Meghalaya Badminton Championship 2023” ba la pynïaid da ka West Khasi Hills District Badminton Association ha ryngkat ka jingïatrei lang bad ka Meghalaya State Badminton Association, ka la poi sha ka ba kut ha ka sngi Saitjaiñ ha Indoor Hall Stadium Nongstoiñ.
Ïa ka nam lahduh ha kane ka lympung ïalehkai kaba lai sngi la rah da ka kynhun ïalehkai jong ka East Khasi Hills District Badminton Association (EKHDBA). Ïa ka kyrdan ba-ar la ïoh da ka West Khasi Hills District Badminton Association (WKHDBA) bad ka kyrdan balai ka leit sha ka West Jaiñtia Hills District Badminton Association (WJHDBA).
Ka EKHDBA ka la khur haduh 15 tylli ki takma ksiar bad 8 ki takma rupa. Ka WKHDBA ka la khur mar 4 tylli ki takma ksiar bad takma rupa. Katba ka WJHDBA ka la khur 3 tylli ki takma ksiar bad 6 tylli ki takma rupa.
Haba phai ha ki katto katne ki jingïakhun phainal ha kane ka lympung, ha ka Men’s Singles u Mebanker Shulai (WJH) u la ïoh ban khur ïa ka nam jop hadien ba u la lah ban pynliem noh ïa u Rituraj Nag (EKH). Ha ka Men’s Doubles, u Kiefer Shullai bad u Ritu Raj Nag na EKH ki la khur ïa ka jingjop da kaba pynliem noh ïa u Ram Najair bad u Deilang Nongpluh na WJH.
Shuh shuh ha ka Under-13 Girls Singles pat ïa ka nam jop la khur da ka Ïapynhun Dkhar na WKH kaba ka la pynliem noh ïa ka Asem Chanu na EKH. Ha ka Under-13 Boys Singles, la jop da u Ram Passah na WJH hadien ba u la lah ban pynliem noh ïa u Tuleietrie Kyndiah na WJH, katba ha ki Under-15 Girls Singles ïa ka nam jop la khur da ka Netina T. Tariang na EKH hadien ba ka la pynliem noh ïa ka Dephishisha Dohling na ka YTBC. Ha ka Under-15 Boys Singles la jop da u Gavin Kharbuki na ka EKH ïa u Amrit Singh na EKH. Ha ka Under-17 Girls Singles ïa ka nam jop la rah da ka Pratiksha Joshi na EKH hadien ba ka la pynliem noh ïa ka Sneha Chettri na ka EKH. Katba ha ka Under-17 Boys Singles la khur jingjop da u Raynell Kharbuki na EKH hadien ba u la jop ïa u Pratham Majumdar na EKH.
Haba phai sha ka kyrdan ïalehkai Under-19 Girls Singles, ïa ka nam jop la khur da ka Pratiksha Joshi na EKH hadien ba ka lah pynliem noh ïa ka Ïabanpynhunshisha na WKH. Katba ha ka liang ki shynrang u Gaurav Singh na EKH u la khur jingjop hadien ba pynliem noh ïa u Benhanan K.Wanlang na ka YTBC.
Ïa ki khusnam sha baroh ki nongjop la sam da u MLA ka Rambrai u R.G. Momin kum u kongsan ha ryngkat ka jingïadonlang ruh u Deputy Commissioners ka West Khasi Hills u Bah Garod LSN Dykes (IAS), Bah K. Thabah, ADC West Khasi Hills kum u chairman ka Organising Committee, ka DSO West Khasi Hills ka Kong B. Syiem, ki dkhot ka MSBA, WKHBDA bad kiwei.
Kum ban shu pynkynmaw, ïa kane ka lympung la sdang naduh 2 tarik mynta u bnai. Ki la don kumba 10 tylli ki kynhun kynthup kawei ka klob na ki distrik bapher bapher jong ka jylla kiba la wan ban ïashim bynta ha ki kyrdan ïalehkai Under-19, Under-17, Under-15, Under-13.
