Shillong, Nailar 06:
Ka Mawreng SC, Umphyrnai SC, PFR Football Academy lem bad ka Mawlai SC ki la jam sha ka semi final ha ka Under-14 Boys League 2023 ba la pynïaid da ka Shillong Sports Association.
Ha ka jingïakhun quarter final kaba la long ha ka sngi Saitjaiñ ha madan Polo, ka PFR ka la pynjem khnap ïa ka Sohryngkham SC da 12-0 kol. U Kevinson Synrem u la khur ïa ka hat-trick da kaba ïoh thep ha ka minit kaba 7, 30 & 31. U Rafiel Nongkynrih (30 & 37), Khrawpyrkhat Nongkynrih (32 & 59) bad u Banjiedlang Khongsit (39 & 44) ki la thep mar ar kol. Katba ïa ki shi kol la thep da u Lamshwa Rynjah (9), Aiborlang Khongtip (12) bad u Mangpaka Nongkynrih (54).
Ha ka jingïakhun kaba bud, ka Umphyrnai SC ka la jop da 8-0 ïa ka Rangdajied United. U Vickyson Wankhar u la thep ar kol ha ka minit kaba 38 & 57. Katba ïa ki shi kol la thep da u Bankyrshanbor Kharkongor (3), Dibormi Kharkongor (8), Baniar Kharsahnoh (32), Donestar Mylliemngap (34), Damebantei Kharkongor (40) & Levelson Kharkongor (47).
Kumjuh ka Nangkiew Irat SC ka la shah rem da 4-0 kol ha ka Mawreng SC. Kane ka la wan lyngba ka hat-trick ba la thep da u Borntios Dkhar ha ka minit kaba 6, 17, 29 & 36.
Haba phai sha kawei pat ka jingïakhun, ka Mawlai SC ka la pynliem noh ïa ka Mawkriah West SC da 3-0 kol. U Manbha Nongkhlaw u la thep ar kol ha ka minit kaba 44 & 50, katba ïa ka shi kol la thep da u Iasan Dohling (43).
Lyngba kine ki nam jop, ka Mawreng, Umphyrnai, PFR bad ka Mawlai kin pynkhreh ban ïakhun ïa ka semi final ha ka 12 tarik mynta u bnai na ka bynta ban ïaknieh rung sha ka final.
