Amsterdam, Nailar:
Katkum ka jingbud dien bad jingwad bniah jong ki tnat na United States, la shem ba kito ki paidbah kiba hap hapoh jong kito ki nongbah ka Ukraine kiba la shah kam trai bad shah kurup noh ha ka Russia, ki ju shah pynbor ba ki dei ban pdiang ba mynta ki la long ki nong Russia bad kim dei shuh ki nong Ukraine.
Ki briew jong ka Yale University ki la shem ruh ba nalor ka jingthmu jong ka Russia ban pynlong nongshong shnong trai noh jong ka Russia ia ki paidbah na ki 4 tylli ki bynta ka Ukraine kynthup ia ka Luhansk, Donetsk, Kherson bad ka Zaporizhzhya, ka Russia ka thmu ruh ban weng noh ia ka jinglong trai ri jongki ha Ukraine.
Kumta, ki la don shibun tylli ki kyndon ba la wanrah da u President ka Russia- u Vladimir Putin, naka bynta ban pynlong nongshong shnong trai noh ia kitei ki paidbah kum ki nongshong shnong ba pura jong ka Russia naduh ba ka Russia ka la ioh kurup bad ka la pyniasoh noh shalade ia kitei ki 4 tylli ki bynta kiba dei ki jong ka Ukraine baroh shi katta ki snem ba la leit.
Katba, ia kito ki paidbah ki bym shym treh ban pdiang ia ka jinglong trai kum ki nongshong shnong ka Russia, ki shah pyrkhing bad ki shah pynduh lut ki lad jingiarap bad ki jingdonkam baroh namar ka jingbym kohnguh jongki ia ka sorkar Russia kaba la synshar mynta ia kitei ki 4 bynta watla ki long ki jong ka Ukraine.
Hynrei, la ong pat ba kiba bun hi ki paidbah nongshong shnong jong ka Ukraine, kiba la hap ha kito ki bynta ba la shah synshar ha ka Russia, kim don lad shuh da kum wei lait na ka ban pdiang ia ki jingpyniaid jong ka Russia bad ba kin pdiang ia ka jinglong trai ri ha Russia haba ki kwah ban im, namar lada kim kohnguh ia kata, kin shah rah bad kin shah pynshitom beiñ ha ka Russia.
Haba iadei bad kane, la ong ba ka International Criminal Court (ICC) ka la maham pyrshah ia u President ka Russia- u Vladimir Putin halor ki jingeh kiba ka Russia ka la wanrah ia ka pyrthei bad ba kiba bun ki khyllung- khynnah jong ka Ukraine ki la poi sakma na la ki jong ki kmie- ki kpa.
Hynrei ka Russia ha kine ki khyndiat por ba la leit, ka la ong ba lada ka ICC kan phah kem ia u Putin, kane kan wanrah ia ka thma bah kaba jur tam ha ka pyrthei na ka jing bitar jong ka Russia.
