Agartala, Nailar:
Ka jingap slem na ka bynta ka jingpyntreikam ïa ka liengsuiñ bar ri hapdeng ka Agartala bad Chittagong shen yn sa pynbna noh.
U Myntri Rangbah jong ka jylla u Dr. Manik Saha u la pynïaid ïa ka jingïalang jong ki heh sorkar ha ryngkat ka jingdonlang jong ka Transport Minister ka Sushanta Chowdhury na ka bynta ban ïakren halor kiba bun ki mat bakongsan ha kaba ïadei bad ka jingpynbna ban wanrah ïa ka jingtreikam ka liengsuiñ bar ri ha ki jaka ba la buh.
U Myntri Rangbah ha ka jingïalang u la ong ba ki bynta kiba kongsan la dep ban shim lypa na ka bynta ban pynbna ïa ka Maharaja Bir Bikram Airport, Agartala kum ka International Airport. Ha kaba ïadei bad ka jingkyrpad na ka Ministry of Home Affairs, u Myntri Rangbah u lah phah ïa ka hukum sha u Director General of Police ba un shim ïa ki sienjam na ka bynta ban thung ïa 17 ngut ki phlit na ka bynta ban khmih bniah ïa ki nongleit jingleit ha ka jaka sangeh liengsuiñ.
U la bthah ruh ïa ki tnat Transport bad ka tnat pulit ba kan shim ïa ki sienjam na ka bynta ban pynbiang ïa ki jingdonkam kumba la hukum ka Ministry of Civil Aviation bad ka Ministry of Home Affairs.
