Tehran, Nailar:
Katkum ki khubor la ong ba ki bor pyniaid ka Iran ha kane ka kynti, ki dang pynkhreh sa kiwei pat ki aiñ kiba kham eh bad kiba kham jur haba iadei bad ka jingpyrkhing ia ki kynthei hapoh ka ri ba ki dei ban bud ia ka rukom riam ba la buh da ka sorkar khamtam haba iadei bad ka jaiñ kup ‘Hijab’ kaba ki kynthei Muslim ki ju dei ban tap ia ka khlieh jongki. La ong ba kane ka khubor ha kane ka por, ka long tang hashwa ki katto katne taiew ba ka jingiakhih paidbah ki nong Iran kan dap noh shi snem. Katei ka jingiakhih paidbah ka long hadien ka jingkhlad jong ka samla 21 snem hadien ba shah rah ha ki pulit sha thanat tang namar ba kam shym deng ia ka jaiñ kup ‘hijab’ ha ka khlieh jongka.
Kitei ki aiñ ba ka sorkar Iran ka dang pynkhreh ha kane ka por, ka long ban pynjur ia ki jing pynshitom khamtam ia ki kynthei ki bym kup jaiñ ia ka khlieh jongki haba mih sha ki jaka paidbah bad kane ka lah ruh ban poi shaduh u pud ba kin hap ban shong patok kham slem lada ki leh pyrshah ia ka aiñ.
Ki heh nongpynïaid ka Iran, ki ong ba katei ka Bill lane ka aiñ ban sa wanrah, kan long ban pynkynmaw ia ki paidbah nongshong shnong ka Iran ba kin nym lah ban iaid lait na ki kyndon bad ki aiñ ba la buh da ka ri watla ki mih ban ïakhih paidbah lane ki pyrshah ia ka sorkar da ka bor.
