Shillong, Nailar 07:
Ka England ka la jam shaphrang sha ka quarter-final jong ka Women’s World Cup hadien ba ka lah pynliem noh ïa ka Nigeria lyngba ka tie-breaker da 4-2 kol, wat la ka Lauren James ka la shah sei red card.
Ka Georgia Stanway ka la ïoh ban thep kol ha ka jingïashut tie-breaker, hynrei ka Nigeria ka la pynlehnohei ïa ki ar tylli ki kabu ksiar. Katei ka lahduh ha Europe ka la lah ban pynthikna ban jam sha ka quarter final hadien ba ka Chloe Kelly ka la lah ban pynurlong ïa ka kol kaba khatduh.
Wat la kine ki kynhun kim shym la lah ban thep kol, hynrei hashwa ban kut ka jingïalehkai ka James ka la ïuh na ka met jong ka ’thei ïalehkai ka Nigeria kaMichelle Alozie ha ka minit kaba 87 bad ka la shah sei da red card hadien ba la bishar bniah lyngba ka Video Assistant Referee (VAR).
Lyngba kane ka jingjop ka England ka lah ban ïakynduh pyrshah ïa ka Colombia lane ka Jamaica ha ka sngi Saitjaiñ na ka bynta ban ïaknieh rung sha ka semi final.
Haba phai sha kawei pat ka jingïakhun, ka Australia ka la pynliem noh ïa ka Denmark da 2-0 kol na ka bynta ban jam sha ka quarter-final ha Stadium Australia.
Ka Caitlin Foord ka la ïoh ban pynkhih jar nyngkong eh ha ka minit kaba 29 hadien ka jingïarap pynbuh da ka Mary Fowler. Ïa ka kol kaba ar la pynbuh da ka Hayley Raso ha ka minit kaba 70 hadien ka jingiarap lang ka Emily van Egmond.
Lyngba kane ka jingjop, ka Australia kan ïakynduh quarter final pyrshah ïa ka France lane ka Morocco ha ka sngi Saitjaiñ.
