Shillong, Nailar 07:
Ka Shooting Association of Meghalaya (SAM) kan pynlong ïa ka lympung ïakop siat suloi ba la tip kum ka 10th North East Zone Shooting Championship ha Assam Regimental Centre, Happy Valley, Shillong naduh 20 haduh 27 tarik mynta u bnai.
Ïa kane ka jingïakop yn pynlong hapdeng ka jingkhmih jong ka National Rifle Association of India bad yn kyrshan lang da ka tnat ïalehkai jong ka Sorkar Jylla.
Nalor ka Meghalaya, yn wan ïashim bynta da ki nongïalehkai kiba na Assam, Manipur, Mizo-ram, Nagaland bad ka Arunachal Pradesh. Te kumta la khmih lynti ba kin wan ïashim bynta kumba 300 ngut ki nongïalehkai na kine ki jylla ha ka kyrdan ïalehkai Under-21, Under-19, bad Under-16.
Ki jingïakop siat ha kane ka lympung ki kynthup ïa ka 10m rifles & pistol, 25 m pistol, 50m rifle open sight & peep sight bad ka 50m pistol na ka bynta ki shynrang bad kynthei. Ka tarik ban pdiang khatduh ïa ki nongïashim bynta kan long ha ka 14 tarik mynta u bnai.
