Imphal, Nailar:
Kiba bun na ki MLA jong ki Kuki ki la pynpaw ïa ka jingbym sngew kwah ban don bynta ha ka dorbar ha Manipur Assembly ïa kaba la thmu ban pynlong ha ka 21 tarik, Nailar naba dang bteng ka jingïakhih, la ïathuh ki nongïalam jong ka kynhun jait bynriew ha ki nongthoh khubor.
Ka seng kaba heh jong ki Meitei, ka COCOMI, kaba la buh ka jingdawa ba la dei ban sdang noh kham kloi ïa ka dorbar jong ka Assembly kaba la kyntait ïa ka jingthmu ban phiah ïa ka rukom treikam jong ki nongsynshar kiba dei ki Kuki, ha kaba ïadei bad kane, ka la pynshisha ba kan ym don kano kano ka jingap jingma ne ka jingsyier ïa ki MLA lada ki ïashim bynta ha ka dorbar.
“Naba la sakhi ba ki jinglong jingman ki dang shah ktah jur naba dang bteng ki jingïakynad ha Manipur, kan ym long kaba suk na ka liang jong nga ban don bynta ha ka dorbar ka ban sa pynlong,” la ong u LM Khaute, uba long u MLA jong ka seng BJP na Churachandpur, kaba long kawei na ki distrik kaba la jur bha ka jingshah hiar thma bad kumjuh ka jingïakynad, ha ka jingïakren bad ki nongthoh khubor.
