Shillong, Nailar 07:
U Lionel Messi u la kylla long u ’rang thep kol ba kynsai ka Inter Miami ha u 2023 hadien ba u la lah ban thep haduh 7 kol na ki saw sien ki jingïakhun ha ka Leagues Cup na ka bynta katei ka kynhun ïalehkai MLS.
Kumba ka paw u Messi u la lah ban ïalehkai bha na ka bynta Miami ha ka Leagues Cup. Hadien ba u la lah ban thep kol lyngba ka free-kick ban pynïakhaid kylla pyrshah ïa ka Cruz Azul ha ka jingïoh mih madan ha ka sien kaba nyngkong, u Messi u la ïai bteng ban thep ar kol pyrshah ïa ka Atlanta United bad ka Orlando City. Hadien u la lah ban thep biang sa ar kol pyrshah ïa ka FC Dallas ha ka pre-quarter final kaba la long ha ka 6 tarik mynta u bnai kaba long ka jingïalehkai kaba nyngkong shabar na la ïing na bynta ka Miami.
Hadien ba u la lah ban thep kol da kaba u la lah ban shut da ka kjat kadiang na shabar jong ka ‘box’ hadien ka jingïarap pynbuh da u Jordi Alba, u Messi u la ïoh ban thep kol biang ha ka minit kaba 85 lyngba ka free-kick na ka bynta ban ïakhaid mar 4-4 ha shwa ba ka Miami kan khur jingjop lyngba ka tie-breaker.
Ka long biang sa kawei pat ka jinglah ban ïalehkai bha u Lionel Messi ha Dallas bad haduh mynta u la long u rangïalehkai uba la tam ha ka jinglah ban thep kol na ka bynta ka Inter Miami tang ha ki saw sien ïakhun.
Nalor u Messi, uwei pat u rangïalehkai u la lah ban ïalehkai bha hapdeng ka FC Dallas bad ka Inter Miami u dei u Allan Velasco. Une u rangïalehkai shapdeng ka Argentina u la ïalehkai na ka bynta ka Dallas, ha kaba u la ïoh ban thep kol watla ka kynhun jong u ka la shah rem lyngba ka tie-breaker.
U Velasco u la pynpaw shaphang ka jingïoh ban ïakhun pyrshah ïa u Messi ha ka Leagues Cup. “Ka long ka bym lah ban klet ïa nga namar ka long ka sien kaba nyngkong eh ba nga la ïoh ban ïakynduh markhmat ha madan. Nga la shu ïohi ïa u na jaka shong, hynrei ngam pat ju ïakynduh ha madan. Nga kyrmen ba ngan ïoh ïa ki buit ïalehkai kum ma u.”
