Itanagar, Nailar:
Ki briew ha ki lai tylli ki shnong kiba don ha West Siang ha Arunachal Pradesh ki la byrngem ban ym ïashim bynta ha ka ilekshon General bad Assembly ki ban sa long ha u snem ban wan lada jia ba ka sorkar kam shym lah ban shna ïa ka jingkieng kaba kyrpang, kaba lah ban kyrshan bad ai jingmyntoi ïa ki nongshong shnong.
Ki shnong kiba kynthup ïa ka Rime Moko, Pidi Rime, bad Todi Rime, ki la don ïa kumba 33 tylli ki longïing, kynthup ïa ki 400 ngut ki nongshong shnong bad baroh kiba la ïoh ban thep vote ki la don 300 ngut, katkum ka jinglum khanasamari jong u snem 2011.
Kine ki briew jong kine ki shnong ki la shu pyndonkam da ki dieng tylli na ka bynta ban pynlong jingkieng ha kaba ki la shna dalade hi.
Kane ka jingshna ïa kane ka jingkieng ka long shi bynta ban ïarap ïa ki nongshnong shnong ba kin ïoh ïaid lynti namar ba ka dei ka aïom ba jur slap.
Ha kum kine ki por ba jur ka jinghap slap, kine ki nongshong shnong ki la ïakynduh ïa shibun ki jingeh ha kaba kim ïoh shuh ban leit sha kiwei pat ki bynta jong ka jylla namar ka jingbym biang ki jingkieng kiba dei ban ïaid nalor ka wah Hijum, kaba dei ka shnat jong ka wah Pisam.
