Shillong, Nailar 08:
Ka Shillong Lajong FC ka la mad biang ïa ka jingshah rem kaba ar ha ka Durand Cup 2023, hadien ba ka la shah pynjem khnap ha ka FC Goa haduh shiteng dorjon (6-0 kol) ha ka sngi Ba-ar ha Indira Gandhi Athletic Stadium kaba ha Guwahati.
Ha kane ka jingïalehkai u Noah Sadaoui u la khur ïa ka hat-trick, katba ïa ki shi kol la thep da u Rowllin Borges, Victor Rodriguez bad u Carlos Martinez na ka bynta ban pynlong ïa kane kynhun ïalehkai Indian Super League na Goa ban khur ïa ki lai point na ka Group-D.
Ha ka jingïakhun kaba nyngkong ka Lajong ka la shah rem da 4-0 kol ha ka NorthEast United FC, pynban ha kane ka jingïakhun kaba ar kam shym la lah ban shan hakhmat ka jingkhlaiñ bor ka FC Goa.
U Assistant coach u Benito Montalvo u la shimti ban pynïaid ïa kane ka klob na Goa. Kane ka dei na ka daw ka jingbym lah ban ïadon lang u coach u Manolo Marquez, uba la shah ai jingsneng da ka red-card ha ka aïom ba la dep.
Utei u coach na Argentina u la ailad ïa u Sandesh Jhingan, Odei Onaindia bad u Rowllin Borges ban ïalehkai nyngkong na ka bynta ka klob, katba u Carlos Martinez, Victor Rodriguez bad u Raynier Fernandes ki la ïoh ban mih madan nyngkong ha ka kylla miet. Katba ka Shillong Lajong ka la pynmih kham bun da ki rangïalehkai kane ka Jylla lem bad katto katne ngut kiba na ka thaiñ shatei lammingi.
Kane ka lympung ka long shi bynta jong ka jingpynkhreh namar ka Lajong ka la wanphai biang sha ka I-League, katba ka FC Goa ban pynkheh ïashim bynta ha ka ISL jong ka aïom ka ban wan.
Ka FC Goa ka la shimpor tang 15 minit ban pynkhih jar bad ïa kane la thep da u Borges, hadien ba u Devendra Murgaokar u la ïoh ban shut ïa ka free-kick. Hadien san minit u Noah Sadaoui u la thep ïa ka kol kaba ar na ka bynta ka Goa bad ula pynbud biang ia ka kol kaba ar ka jong u ha ka minit kaba 27 na ka bynta ban tam da 3-0 kol.
Hadien ba la bteng biang ïa ka jingïakhun jong ka kylla miet, ka Goa ka la thep biang ïa ka kol kaba saw lyngba u Rodriguez ha ka minit kaba 69. Hashwa ban wai ka Goa ka la thep biang sa ar kol lyngba u Martinez (83) bad u Noah (86), uba la khur ïa ka hat-trick na ka bynta ban khur syndon ïa ka jingjop.
Ka Lajong kan ïalehkai khatduh ha kane ka lympung pyrshah ïa ka Downtown Heroes na Kashmir ha ka Sngi U Blei ha ka por 4:45 janmiet.
