Limoges, Nailar:
Katkum ki khubor la ong ba uwei u khynnah ba dang ha ki khat’ snem ha ryngkat bad uba shong lang hadien jong u, ki la khlad noh hadien ka jingphet krad jong ki na ka kti ki pulit, pynban utei u khynnah u la kum leit tynrah pat ia kawei ka kali hapdeng ka jingphet lamwir jong u tang ban lait na ki pulit.
Kane ka jingjia ka long tang hadien katto- katne taiew ba ka France ka sakhi ia kawei ka jingjia kaba la wanrah ia ka jingiakhih hapoh ka ri namar ka jingsiat jong ki pulit ia uwei u khynnah 17 snem na Arab, tang namar ba u kiar bad iaid lait na ka jaka talasi jong ki pulit.
Hynrei, ha kane ka jingjia pat ki pulit ki la iathuh ba kam dei ka jingsiat ne jingbakla jongki. Hynrei utei u khynnah uba ñiah ia katei ka thuk- thuk u la phet krad da ka jingtieng ia ki pulit, ha kaba u la kum leit tynrah pat sa ia kawei ka kali kaba wan mar pyrshah bad u ha katei ka sngi.
Kane ka la jia hadien ba katei ka thuk- thuk ka la tur bad pynher beit- beit khlem da peit shuh ia ki light traffic ‘Red Light’ bad kumta katei ka thuk- thuk ka la iakynduh markhmat beit bad kawei pat ka kali kaba dei na ka liang ban iaid ha ka ‘Green Light’. Kane ka la pynlong ia utei u nongñiah ba un khlad hashen, katba utei uba shong nadien pat u la mynsaw jur hynrei u la khlad noh hi tang hadien khyndiat kynta ba la pynkit ia u sha hospital naka bynta ki jingsumar ba kham bniah.
