Kyiv, Nailar:
Ki heh ka Ukraine ha ka Sngi Ba-ar ki la iathuh ba 2 tylli ki ‘namding ka Russia ki la leit bthei ha ka nongbah Pokrovsk kaba don shaphang Mihngi jong ka Ukraine ha ka Sngi Nyngkong bad kaba la shim ia ka jingim jong 5 ngut ki briew, ha kaba bun ngut pat ki la mynsaw jur na katei ka jingbthei.
U President ka Ukraine, u Volodymyr Zelensky u la pynbna ba ka Russia ha katei ka sngi, ka la ther ‘namding sha kawei ka ïingmala ba shong briew bad katei ka iing ka dei kaba don 5 mala bad baroh ki bynta ba shalor ki la julor lut.
Ki tnat iarap jong ka Ukraine ki la leit her mar-mar sha katei ka thaiñ hadien ba la ioh jingtip shaphang ka jingbthei ha katei ka ïingmala ba shong briew, naka bynta ban ioh pyllait im noh ia ki briew kiba don hapoh ha ka por kaba biang.
Ka Pokrovsk ka don kumba 70 Kilometre lane kumba 43 Mile na ka phang North West jong ka nongbah Donetsk, kaba la hap hapoh ka kti jingsynshar ka Russia bad kumba 50 Kilometre lane kumba 30 Mile pat na ka jaka iakhun thma hapdeng ki shipai ka Russia bad Ukraine.
Hadien ba la ioh ban leit sei bad pyllait im noh ia kiba don hapoh katei ka ïingmala ha katei ka sngi, la ioh jingkheiñ ba ki don kumba 31 ngut kiba ngat bad mynsaw ha katei ka jingbthei.
Napdeng jongki, 19 ngut ki dei ki heh pulit, 5 ngut ki dei ki briew jong ka tnat iarap bad iwei i khyllung.
Watla katta, ki tnat iarap ki dang ialeh ban khyllie ia ki bynta ba la twa ha katei ka jaka ioh lehse ki dang don kiba dang jah rngai bad kiba la shah tap ha katei ka jingjulor.
U President ka Ukraine u la pynpaw ka jingsngewsih halor ka jingduh noh ia ki mynsiem briew ha katei ka jingleit thombor ka Russia bad ha kajuh ka por ruh u la byrngem pyrshah ia ka Russia ba ka Ukraine kan pynphai kylliang bad kan pynhiar kput ia ka Russia kumba ka la leh bad pyniap dusmon ia ki paidbah nongshong shnong ka Ukraine ha kane ka por.
