Shillong, Nailar 08:
U khlur ïalehkai phutbol ka Brazil u Neymar u lah ban mih noh na ka Paris Saint Germain (PSG) ha shwa ban kut ka ïew ïathied rangïalehkai mynta u bnai.
Une u rangïalehkai shakhmat ba la 31 snem ka rta u la pyntip sha ka PSG ba u la kwah ban mih noh. Ka kontrak jong u Neymar bad kane ka klob kaba na France kan kut haduh u 2027. Hynrei da ka jingmih noh u Lionel Messi ban leit ïalehkai na Inter Miami bad u Kylian Mbappe ruh uba la pynkhreh ban mih noh. Te kumta kane ka klob ka la don hapdeng ka jingeh kaba khraw.
Ha kum kane ka por, ka PSG ka la soi ïa u rangïalehkai shakhmat na Portugal u Goncalo Ramos hadien ba ka la shim wai na ka Benfica. Kane ka klob kam don lad ban thied ïa u.
“Ka long ka jingsarong bad ka jingkmen ban pynïasoh sha ka Paris Saint-Germain. Ka PSG ka long kawei na ki klob kaba heh ha ka pyrthei bad kaba don ruh ïa ka kynhun kaba khlaiñ bor,” la ong utei u rangïalehkai ba dang 22 snem rta.
Kat kum ki khubor la ong ba u Neymar u la thrang ban leit phai biang sha ka Barcelona, hynrei kane ka klob kan ym lah bor ban wanrah biang ïa u namar kan hap ban die ïa kiwei rangïalehkai na ka bynta ban ïaryngkat bad ka dor ka jong u.
Na ka bynta u Neymar, ka Chelsea kaba la thmu ban wanrah sha ka English Premier League, ka la pynpaw ba kan pyrshang ban ïakren bad u nonglam ktien jong utei u khlur ïalehkai, hynrei kan hap ban ap ïa ka rai lada u kyntait ia ka jingtyrwa ban leit sha ka Saudi Premier League.
