Jowai, Nailar 08:
Ki hat-trick ba la khur da u Precious Tang bad u Manhok Suchiang ki la biang pura ïa ka Madan Thadmuthlong ban khur jingjop ha ka lympung ïalehkai 3rd Division Football Tournamnet na ka bynta ka 3rd Adelbert Memorial Trophy ba la pynïaid da ka West Jaiñtia District Sports Association (WJDSA).
Kane ka nam jop ka la wan hadien ba ka la ïoh ban khyrwit haduh 12-0 kol ïa ka Nangbah Khlopano ha ka sngi Ba-ar ha Kiang Nangbah Stadium, kaba ha Ladthadlaboh, Jowai.
U Precious Tang ha kane ka jingïalehkai u la ïoh ban thep haduh saw kol ha ka minit kaba 7, 16, 36 & 44. Ïa lai kol kiwei pat la thep da u Manhok Suchiang ha ka minit kaba 15, 27 & 38. U Samsauru Papiah u la the par kol ha ka minit kaba 29 & 39. Katba ïa ki shi kol la thep da u Sumar Tang ha ka minit kaba 53, u Francis Sumer (62) bad u Phermi Suchiang (63) na ka bynta ban pynlong ia ka Madan Thadmuthong ban khur syndon ïa ka jingjop.
Ha ka jingïakhun kaba bud, ka Mookaswan Dongnein ka la pynliem noh ïa ka New Hill da 2-0 kol. Ïa kine la thep da u June Shylla ha ka minit kaba 50 & 54.
Ka Khliehshnong Ïalong ka la pynjem khnap ïa ka Salaroh haduh 6-0 kol. U Sainkiru Pale u la thep ar kol ha ka minit kaba 4 & 9 ryngkat bad u Shanlang Lyngdoh ha ka minit kaba 12 & 45. Ïa ka shi kol la thep da u Ashiel Pale (14). Kane ka kynhun ka la ïoh ei sa shi kol naba ïarap pynthep da u rangialehkai ka liang pyrshah u Arkini Kyndong ha ka minit kaba 20.
Haba phai sha kawei pat ka jingïakhun kaba khatduh, ka Mulang Ïalong ka la pynliem noh ïa ka Samaro da 2-0 kol. Ïa kine la thep da u Skhemlngki Pale ha ka minit kaba 42 bad u Rlima Pale ha ka minit kaba 62.
