Shillong, Nailar 08:
Ka ’thei ap kol jong ka Laitkor Sports Club ka Ribansi Jamu ka la long sa kawei pat ka ’thei ïalehkai ka ban shah jied na bynta ban leit pyntbit hapoh ka shlem ai jinghikai jong ka Bhaichung Bhutia Football Schools (BBFS) ha Nashik, Maharashtra.
Kane ka ’thei ïalehkai ka la ïadon bynta bad ka kynhun ïalehkai jong ka Laitkor, kaba la wan ba-ar ha ka Women’s League kaba dang kut shen ha kane ka nongbah.
Kumta ka Ribansi kan ïasoh lang bad kawei pat ka para nongïalehkai jong ka Smit SC, ka Ïaraplang Nongrum ha katei ka shlem ai jinghikai kaba ha Nashik.
Kum ban shu pynkynmaw, ka Ribansi ka la khur ruh ïa ka nam Best Goalkeeper ha ka U-17 Girls jong ka State Level Subroto Cup ha u snem ba la dep ha ka por ba mihkhmat ïa ka Sati Raja Memorial SS na Ri-Bhoi District.
