Agartala, Nailar:
Ki la don kumba 7 ngut ki nong Bangladesh, kynthup ïa arngut ki kynthei bad lai ngut ki khynnah, kiba la shahkem ha ki pulit ha Dharmanagar kaba don ha North distrik ha Tripura ha ka lah sngi U Blei.
Kane ka jingkem ïa ki ka la long hadien ba la ïoh ïa ka jingtip kaba bniah shaphang jong ki da ki pulit.
Kumba la ïoh jingtip, la ong ba kine ki briew ki la rung beaiñ sha ki bynta jong ka ri ha u snem 2020 na ka bynta ka jingthmu ba kin wan ban trei bad ki la shong la sah ha Bangalore naduh katei ka por. Kine kiba la shah kynnoh ki dei kiba na ka thaiñ Rajbari bad Cox’s Bazar jong ka Bangladesh, ki la shah rah na ka bynta ka jingshah tohkit halor ka jingthmu jong ki ban mih na ka jylla lyngba ka rel Humsafar Express. Kiba la shahkem ki kynthup ïa u Karta Mohammad Liton Sheikh (35), ka kurim jong u ka Fatema Begum (28), ha ryngkat arngut ki khun jong ki, kine baroh ki dei ki nongshong shnong jong ka Ratodanga kaba don ha Bangladesh. Kiwei pat ki dkhot jong kawei pat ka longing ki kynthup ïa u Karta Mohammad Mamun Rashid (21), ka kurim jong u ka Aziza Begum (19), bad ki khun jong ki, kiba dei na Cox’s Bazar ha Bangladesh.
Ki pulit ki la ïathuh ba kane ka kynhun ka la rung sha ki bynta jong ka Dharmanagar lyngba ka Kailashahar kaba don ha Unakoti distrik, halor ka jingthmu jong ki ban leit phai sha Bangladesh lyngba ka jingai jingïarap jong ki briew kiba ju ïarap ïa ki bar ri ban rung ne mih na ka ri.
Ha kaba ïadei bad kane, ka la don ka jingbuh jingujor pyrshah ïa kine ki 7 ngut ha ka jaka treikam jong ki pulit ka Dharmanagar, ka jingtohkit ha kaba ïadei bad ka jingjia ka dang ïai bteng.
