Shillong, Nailar 08:
Ka Tottenham Hotspur ka la soi ïa u rangïalehkai ‘dien na Netherlands u Micky van de Ven na ka Wolfsburg ha ka dor £34.5m na ka bynta ka kontrak kaba hynriew snem, la pynbna kane ka klob jong ka Premier League ha ka sngi Ba-ar.
Une u rangïalehkai ba dang 22 snem ka rta, u la leit ïasoh sha ka Wolfsburg ha u 2021. U la ïoh ban ïalehkai 41 sien na ka bynta katei ka klob jong ka Bundesliga ha baroh ki lympung ïalehkai bad u la ïoh ruh ban ïalehkai 11 sien na ka Netherlands ha ka Under-21.
Ha Wolfsburg, u Van de Ven u la ïoh ban ïalehkai kum u rangïalehkai ‘dien balai bad basaw ha kaba katei ka klob ka la wan ha ka kyrdan ba phra ha ka aïom ba la dep.
“Ngi sngewkmen ban pynbna halor ka jingsoi ïa u Micky van de Ven na ka VfL Wolfsburg hadien ba u la lah ban pyndep lut ïa baroh ki jingdonkam jong kane ka jingkynriah sha kawei pat ka ri,” la pynpaw ka Spurs ha ka kyrwoh.
“Utei u rangïalehkai ‘dien u la soi ïa ka kontrak bad ka klob ka ban kut haduh u 2029 bad un phong ïa ka jersey number ba 37.”
Ka jingsoi ïa u Van de Ven ka long hadien ba kane ka klob ka la dep ban soi ïa u James Maddison, Pedro Porro, Guglielmo Vicario, Manor Solomon bad u Ashley Phillips.
Kumta ka Spurs kan sdang ïa ka jingïalehkai shabar na la ïing ha ka Premier League pyrshah ïa ka Brentford ha ka Sngi U Blei.
