Shillong, Nailar 08:
Ka Pommura SC ka la wanphai da ka jingjop ha ka U-20 4th Division Football League 2023 ba la pynïaid da ka Shillong Sports Association hadien ba pynliem ïa ka Mawnianglah YSC da 3-0 kol ha ka Sngi Ba-ar.
Wat la ha ka jingïalehkai kaba nyngkong kane ka kynhun ka la shah rem da 2-1 kol ha ka Risa Colony, pynban ha kane ka jingïakhun kaba ar kaba la long ha SSA Stadium, ka Pommura ka la wanphai da ka jingkhlaiñ bor ha kaba kam shym la ailad ïa ka liang pyrshah ban pynphai kol.
Hadien shiteng kynta jong ka jingïakhun, ka Pommura ka la ïoh ban pynkhih jar nyngkong eh lyngba u Kitboklang Kharkongor ha ka minit kaba 32. Hadien katto katne por ba la bteng ïa ka jingïakhun jong ka kylla miet, u Andystar Kharsati u la ïoh ban thep kol ha ka minit kaba 53. Une u rangïalehkai shakhmat u la pynbud biang ïa ka kol kaba ar ha ka minit kaba 66 na ka bynta ban pynlong ïa ka Pommura ban khur syndon ïa ka jingjop.
Haba phai sha kawei pat ka jingïakhun hapdeng ka Mawkriah West SC bad ka Risa Colony SC ki la ïasam mar shi point hadien ba kim shym lah ban thep kol haduh bakut ka jingïalehkai.
Ka jingïalehkai ha ka sngi Balang kan long hapdeng ka Laitlulong SC pyrshah ïa ka Umrynjah SC ha ka por 2 baje, katba ka Lamlynti SC ïa ka Mawlynrei SC ha ka por 4 baje janmiet.
