Shillong, Nailar 09:
Ka Umrynjah bad ka Mawlynrei SC ki la bteng ïa ka jingjop ba ar na ka Group-A ha ka U-20 4th Division Football League 2023 ba la pynïaid da ka Shillong Sports Association ha ka Sngi Ba-ar ha SSA Stadium, Polo.
Ha ka jingïakhun kaba nyngkong, ka Umrynjah ka la pynliem noh ïa ka Laitlulong SC da 4-0 kol bad u Malvern Lyngkhoi u la thep ar kol na ka bynta ban kamai 6 point na ki ar sien ïakhun.
Naduh kaba sdang ka jingïalehkai ka Umrynjah ka la ïakhun tyngeh ha kaba ka la ïoh ïa ki kabu kiba biang bad dei ha ka minit kaba 23 ka la ïoh ban pynkhih jar nyngkong eh lyngba u Malvern ha ka minit kaba 23. Une u rangïalehkai shakhmat u la pynbud biang ïa ka kol kaba ar ha ka minit 28.
Kham ha shwa, u Banteilang Kharrngi u la thep ïa ka kol ba ar na ka bynta ka Umrynjah ha ka minit kaba 25 na ka bynta ban tam 3-0 kol ha ka kylla step.
Hadien katto-katne por ba la bteng ïa ka jingïakhun jong ka kylla miet ka Umrynjah ka la thep biang ïa ka kol kaba saw lyngba u Franky Kurbah ha ka minit kaba 51. Wat la ka Laitlulong ka la pyrshang ban pynphai kol, hynrei kam shym la lah ban pynurlong bad ka la mad ïa ka jingshah rem ba ar ha kane ka lympung.
Haba phai sha kawei pat ka jingïakhun ba ar, ka Lamlynti SC ka la mad ïa ka jingshah rem sa ha ka Mawlynrei SC da 1-3 kol.
Ha kane ka jingïakhun ka Mawlynrei ka la lah ban ïalehkai bha naduh kaba sdang ha kaba u Banjop Mawthoh u la ïoh ban thep ar kol ha ka minit kaba 14 & 45. Ïa kawei pat la pynbud da u Winestjun Dohling ha ka minit ba 17.
Katba na ka liang ka Lamlynti ka la lah ban pynphai kylla shi kol lyngba u Pynche Khyllait ha ka minit kaba 60 ha shwa ba kan mad ïa ka jingshah rem ba ar ha kane ka lympung.
Kane ka lympung kan bteng biang ha ka sngi Palei ha kaba ka Mawphlang SC kan ïakhun pyrshah ïa ka Mawreng SC ha ka por 3 baje janmiet ha madan 3rd Ground (MFA Turf Polo), katba ka Kharang SC ïa ka Nongkolew SC ha ka por 4 baje janmiet ha SSA Stadium.
