Shillong, Nailar 09:
Ka Meghalaya Football Association (MFA) ka la hap ban shu jied ïa ki khynnah ïalehkai ki ban mihkhmat ïa ka Jylla sha ki lympung ïalehkai ban pynlong da ka All India Football Federation na ka daw ba kam shym la lah ban pynlong ïa ki lympung ïalehkai Youth League.
Kane ka synjuk ïalehkai ka Jylla ha u snem ba la dep ka la pynbna ba kan pynlong ïa ka MFA Youth League ka ban kynthup naduh ka U-13, U-15, bad U-17. Ki kynhun ki ban khur ïa ki nam lahduh kin ïoh ban mihkhmat ïa ka Jylla sha ki lympung ïalehkai ban pynlong da ka AIFF, hynrei kane kam shym la urlong.
Haba pyrshang ban wad jingtip na ki bor pynïaid ka MFA la ong ba ka daw ka jingbym lah ban pynlong ka dei ba kam shym la ïoh jingïarap pisa na ka Sorkar Jylla. “Ngi la ïoh jingïarap pisa na ka Sorkar Jylla tang ban pynlong ïa ka Meghalaya State League (MSL) mynta u snem, hynrei na ka bynta ka Youth League, ngim pat shym la ïoh jingïarap eiei haduh mynta. Te kumta ngim shym la lah ban pynlong ïa kine ki lympung ïalehkai jong ki khynnah,” la pynpaw uwei na ki dkhot ka MFA.
Ha kaba ïadei bad ki lai tylli ki lympung ïalehkai jong ki khynnah kynthei bad shynrang ki ban long shabar jylla, ka MFA kan hap ban shu jied katto-katne ki khynnah kiba ïashim bynta ïa ki lympung ïalehkai Subroto Football Cup ba la pynlong dangshen da ka tnat ïalehkai ka Sorkar Jylla bad ruh da ka Shillong Sports Association (SSA).
Kine ki lympung ïalehkaiki kynthup ïa ka Hero Junior Boys’ National Football Championship na ka bynta ka Dr B.C Roy Trophy 2023-24 (Tier-1) ka ban long ha Bhubaneswar, Odisha naduh 5 haduh 15 tarik u Nailur mynta u snem, kumjuh ka Sub-Junior Boys’ National Football Championship 2023-24 (Tier-1) ka ban long ha Malda & Berhampore, West Bengal naduh 3 haduh 13 tarik u Nailur mynta u snem bad ka Hero Sub-Junior Girls’ National Football Championship 2023-24 (Tier 1) ka ban sdang naduh 3 haduh 13 tarik u Nailur mynta u snem ha Amritsar, Punjab.
Ha ka Dr B.C Roy Trophy, ka Meghalaya ka la don ha ka Group-B ha kaba kan ïakhun pyrshah ïa ka Kerala, West Bengal bad ka Jammu & Kashmir. Ha ka Sub-Junior Boys’ National Football Championship, ka Meghalaya kaba don ha ka Group-A ha kaba kan ïakhun pyrshah ïa ka Karnataka, SAI bad ka Uttar Pradesh. Katba ha ka ub-Junior Girls’ National Football Championship, ka Meghalaya ka la don ha ka Group-C ha kaba ïa aireng pyrshah ia ka Gujarat, Assam bad ka Chhattisgarh.
