Shillong, Nailar 09:
Kum shi bynta ban ïasnoh kti lang ha ka ban rakhe ïa ka sngi laitluid ka ri, ka shlem treikam u Deputy Commissioner (DC), Eastern West Khasi Hills District ha ryngkat ka jingïatreilang bad ka District Sports Officer (DSO) West Khasi Hills District, kin pynlong ïa ka jingïakob mareh ba la tip kum ka “Independence Day Run (10kms & 5kms) bad cycling (10Kms)’’ ha ka 15 tarik mynta u bnai.
Kane ka jingïakob na bynta ki kynthei bad shynrang ha ka liang ka Junior (18 yrs below) bad Senior Men & Women (19 yrs Above) kan sdang ha ka por 7 baje mynstep na ka shlem treikam u DC ha Mairang.
Kumta na ka liang ki bor pynïaid ki la pynkhreh ruh ïa ki khusnam na ka bynta ki nongjop ha ka 5km – Junior (Men & Women) ka ban long T. 3,000, T. 2,000/- bad T.1,000/- ïa kiba wan nyngkong, ba-ar bad balai. Katba ki nongjop ha ka 10km – Senior (Men & Women) kan long T. 5,000/-, T. 3,000/- bad T. 2,000/- ïa kiba wan ba nyngkong, ba-ar bad balai. Kin don ruh ki khusnam ba mar T.500/- ïa kiba wan ba saw haduh ba shiphew ha baroh ar tylli ki kyrdan ïakob.
Katba ka khusnam ha ka jingïakob ñiah saikil kaba 10km kan long T. 5,000/-, T. 3,000/- bad T. 2,000/- ïa kiba wan nyngkong, ba-ar bad balai. Kan don ruh ka khusnam kyrpang kaba T. 1000/-.
Kumta ki nongïashim bynta kiba don jingthmu ki lah ban leit ai ïa la ki kyrteng ha ka shlem treikam u DC ha Mairang ha ka por long trei kata hashwa ka 11 tarik mynta u bnai.
Kat kum ka kyrwoh ba la pyllait da ka Kong B. Syiem (DSO) la kyntu ïa baroh ki nongïashim bynta ba kin dei ban wan ai jingtip ha ka shlem treikam u DC Mairang ha ka por 6 baje mynstep ha ka 15 tarik.
