Kathmandu, Nailar:
Katkum ki khubor la ong ba ki jingjia shlei um bad ki jingtwa ha kiba bun bynta jong ka Nepal ka la wanrah ia ka jingiap jong 38 ngut ki mynsiem briew hapoh ka shi taiew.
Ki tnat iarap ki dang buddien bad wad sa ia 6 ngut kiwei pat kiba dang jah rngai hadien ka jingshah rong um ki iing ki sem jong ki paidbah nongshong shnong hapoh Kathmandu.
Kumta, la ong ba ki jingshlei um bad jingtwa khyndew ka la kerkut noh ia ki surok heh kiba dei ban pyniasoh bad ka nongbah kaba heh, kaba don sha ka phang South jong katei ka thaiñ.
Ka jingjur jong u slap ha ki khyndiat por ba la leit, ka la pynlong ia ka wah Bagmati kaba don hapoh Kathmandu, ba kan shlei bad wanrah ruh ia ki jingjia shlei um sha ki shnong ba marjan jong katei ka wah bad ka Kathmandu ka don ia kumba 4 Million ngut ki paid nongshong shnong.
Kumta, ki bor pyniaid jong ka katei ka nongbah, ki la bthah ia ki paidbah kiba shong sha ki thaiñ East jong ka Wah Sindhuli ba kin kynriah noh shipor namar ka jingkiew jong ka um ha katei ka wah bad kaba lah ruh ban wanrah ia ki jingjia shlei um bad jingtwa khyndew ha ka por bym lah tip.
