Jowai, Nailar 09:
Ka Mulang Ialong, Mukhla Raij bad Dulong ki la buh jaka ïalade sha ka semi final ha ka lympung ïalehkai Independence Day Cup Under-17 Football Tournamnet ba la pynïaid da ka West Jaiñtia District Sports Association (WJDSA).
Kane ka la wan hadien ba ki la khur ïa ka nam jop ha ka quarter final kaba la long ha Kiang Nangbah Stadium kaba ha Ladthadlaboh, Jowai.
Ha ka jingïakhun quarter final kaba nyngkong kaba la long ha ka sngi Balang, ka Mulang Ïalong ka la pynliem noh ïa ka Ladthadlaboh da 3-2 kol.
Ha kane ka jingïakhun ka Mulang Ïalong ka la pynkhih jar nyngkong eh lyngba u Jeri Dhar ha ka minit kaba 12.
Hynrei ha ka kylla miet ka Ladthadlaboh ka la lah ban pynïakhaid kylla lyngba u Teiborlang Malang ha ka minit kaba 48. Hadien lai minit ka Mulang ka la thep ïa ka kol kaba ar lyngba u Charelang Mulieh. Ka Ladthadlaboh ka la lah ban pynïakhaid kylla lyngba u Medondor Pala (59).
Hashwa ban kut ka jingïalehkai ka Mulang ka la thep biang ïa ka kol kaba lai lyngba u Nidaroi Mulieh ha ka minit kaba 60+9 na ka bynta ban khur syndon ïa ka jingjop.
Ha ka jingïakhun kaba bud, ka Mukhla Raij ka la pynliem ïa ka 7 Wasa United lyngba ka tie-breaker da 4-3 kol, hadien ba kim shym la lah ban thep kol haduh kaba kut ka jingïalehkai.
Ha kawei pat ka jingïakhun, ka Dulong ka la pynliem ïa ka FAM lyngba ka tie-breaker da 4-3 kol hadien ba ki la ïakhaid mar 1-1 kol. Ïa ka kol jong ka Dulong la thep da u Lovingstar Suting ha ka minit kaba 28 bad ïa ka kol jong ka FAM la thep da u P. Papang ha ka minit kaba 33.
Kawei pat ka jingïakhun quarter final kan long ha ka sngi Palei hapdeng ka Demthring pyrshah ïa ka Evergreen Mukhla ha ka por 3: 30 janmiet.
