Imphal, Nailar:
Ki la don kumba lai ngut ki briew kiba kynthup ïa arngut na Assam, dang shen ki la shahkem ha Kamjong distrik kaba don ha Manipur ha ryngkat u Brown Sugar ïa uba la thmu ban khaïi ha kaba la kit ha ka trok na Dimapur. Katkum ka kaiphot ba la phah da ki heh pulit, la ong ba ki shipai jong ka 24 Assam Rifles ki la lap ïa 39 tylli ki synduk sabon ba la antad ba ki la don ha ka jingkhia kaba 460 gram ba la song ïa u drok Brown Sugar na ka kali ha Gamnom Check Post jong ka Kamjong distrik.
Ïa kine ki briew kiba la shahkem la tip kyrteng kum u Adebe Dime ïa uba la tip ruh da ka kyrteng kum u Mataimi AS, 41, uba dei u khun jong u Joyson AS jong ka Old Wahong, Ukhrul distrik, ha kaba mynta ki la shong la sah ha Saijang Zalukei, Nagaland, u Milan Ali, 41, uba dei u khun jong u Shaban Ali jong ka Karai Kheti Bazaar, Barpeta, Assam bad u Sanju Choudhury, 38, uba dei u khun jong u Ajit Choudhury jong ka Masjid Gali, PO-Noonmati, PS- Chandmari, Guwahati, Assam.
Ïa kine ki briew kiba la shahkem ha ryngkat u drok ba la ïoh ban kurup la aiti sha ka jaka treikam jong ki pulit ka Shangshak kaba don ha Ukhrul distrik. Kumba la ïathuh ki pulit, la ong ba ïa ka jingmudui halor ka jingjia la buh ha ka jaka treikam jong ki pulit ka Shangshak katkum ka FIR No. 03(08)2023/SSK-PS U/S: 21(c)/29/60(3) ND&PS Act.
