Shillong, Nailar 09:
U Suryakumar Yadav uba bat ïa ka kyrdan ba nyngkong kum u nongtied ha ka T20I, u la lah ban pynpra ïa ka rekod da kaba ïoh khyrwit ïa 100 tylli ki ‘six’ ha ki jingïalehkai T20. Ha ka Sngi Ba-ar une rangïalehkai u la lah ban pynurlong ïa ka India ban pynliem noh ïa ka West Indies da 7 wiket.
Ha katei ka jingïalehkai T20I balai, u Yadav u la lah ban ïalehkai bha da kaba ïoh 83 run na ki 44 bol kaba kynthup ïa 10 tylli ki ‘four’ bad 4 tylli ki ‘six’. Da ka jinglah kumtei, une nongtied ba kynsai u la lah ban kynjoh sha ki 100 tylli ki ‘six’ ha ki jingïalehkai T20I hadien ba ïalehkai bha ha ka jingïakhun kaba lai kaba la long ha Guyana.
Te kumta une u rangïalehkai u la ïasoh lang bad ki rangïalehkai kiba la don ha ka thup ba snar (elite) jong u Virat Kohli bad u kapten u Rohit Sharma. U Rohit Sharma u la long uba hakhmat eh ban ïoh khyrwit haduh 182 tylli ki ‘six’ ha ki 140 tylli ki jingïalehkai (inning). U Yadav u la lah ban pynurlong ha ki 49 tylli ki jingïalehkai, na ka bynta ban tam ïa ka rekod kaba kham hashwa ba la bat da u Rohit Sharma ïa ka rekod ha ki 84 tylli ki jingïakhun.
Nalor kane, u Surya Kumar Yadav u la long ruh u ba-ar ha ka thup jong ki lympung ïalehkai bar ri, kata hadien u rangïalehkai ka West Indies u Evin Lewis, uba la lah ban pynurlong tang ha ki 42 sien ïakhun.
