Shillong, Nailar 09:
U nongkawang sum jong ka ri u Neeraj Chopra uba la khur ïa ka takma ksiar ha ka Olympic, sa shisien pat un shimti ban ïalam ïa ka kynhun ïalehkai ka ri na ka bynta ka World Athletics Championships ka ban long ha ka 19 tarik mynta u bnai ha Budapest, Hungary.
Ha kane ka kynti kaba mynta ka India kan phah haduh 28 ngut ki nongïashim bynta.
Na ka liang ka tnat ïalehkai jong ka ri ka la pyllait ïa ki kyrteng ki nongïashim bynta sha katei ka lympung.
U nongkawang ‘shot put’ uba la khur ïa ka rekod ha Asia, u Tajinderpal Singh Toor u la weng noh ïalade ban shim bynta ha kane ka lympung ka ban sdang naduh 19 haduh 27 tarik mynta u bnai. Kane ka rai ka la wan hadien ba u la koit na ka jingmynsaw ha ki bynta jong ka shyrkait kaba la jia ha ka Asian Championships kaba la long ha u Naitung.
U rangïalehkai ‘high jump’ uba la bat ïa ka rekod hapoh ka ri u Tejaswin Shankar, kumjuh u nongmareh 800m u K.M Chanda bad ka nongmareh ïaid kjat ba 20km ka Priyanka Goswami (kiba la bat ruh ïa ka rekod hapoh ka ri) ki la rai ban weng noh ïalade na kane ka World Championships namar ki thmu ba pynleit jingmut na ka bynta ka Asian Games ka ban sdang naduh 23 tarik u Nailur haduh 8 tarik u Risaw ha Hangzhou, China.
Kumta u Chopra uba la bat ïa ka nam lahduh ha ka Diamond League u la khmih lynti ban khur biang ïa ka takma ksiar ha Budapest hadien ba u la khur teng ïa ka takma rupa ha ka aïom ba la dep kaba la long ha Eugene, USA ha u 2022.
Ki kyrteng ki ’thei ïalehkai ki ban ïashim bynta ha katei ka lympung ki kynthup ïa ka Jyothi Yarraji (100m Hurdles), Parul Chaudhary (3000m Steeplechase), Shaili Singh (Long Jump), Annu Rani (Javelin Throw) bad ka Bhawna Jat (20km Race Walk). Ha ka liang ki shynrang ki long u Krishan Kumar (800m), Ajay Kumar Saroj (1500m), Santhosh Kumar Tamilarnsan (400m Hurdles), Avinash Mukund Sable (3000m Steeplechase), Sarvesh Anil Kushare (High Jump), Jeswin Aldrin (Long Jump), M Sreeshankar (Long Jump), Praveen Chithravel (Triple Jump), Abdulla Aboobacker (Triple Jump), Eldhose Paul (Triple Jump), Neeraj Chopra (Javelin Throw), DP Manu (Javelin Throw), Kishore Kumar Jena (Javelin Throw), Akashdeep Singh (20km Race Walk), Vikash Singh (20km Race Walk), Paramjeet Singh (20km Race Walk), Ram Baboo (35km Race Walk), Amoj Jacob, Muhammed Ajmal, Muhammed Anas, Rajesh Ramesh, Anil Rajalingam bad u Mijo Chacko Kurian (Men’s 4x400m Relay).
