Jowai, Nailar 10
Shi bynta ban ïasnoh kti lang ha ka jingrakhe ïa ka sngi laitluid jong ka ri India, ka shlem treikam u Deputy Commissioner (DC), West Jaiñtia Hills District ha ryngkat ka jingïatreilang bad ka shlem treikam u District Sports Officer, WJHD, Jowai kan pynlong ïa ka jingïakob mareh thong ba la tip kum ka “Independence Day Run 2023” na ka bynta ki shynrang bad kynthei (open category) ha ka 15 tarik mynta u bnai.
Kane ka jingïakob mareh kan sdang ha ka por 6 baje mynstep na Main Gate Kiang Nangbah Stadium sha Ladthadlaboh Main Road – Jowai Public School – Gate Polytechnic – Kshaid Rymphum – Salaroh – Dulong Poh-hali Road – Dulong – Pamhadem – Panaliar (Civil Hospital) – Iongpiah – Mission Compound – H.K.Singh School – D.C Office – New Hill – National Highway – bad pynkut ha Kiang Nangbah Indoor Stadium.
Na ka liang u DSO, Bah K. Passah, u la pyntip sha baroh ki nongïashim bynta ba ka jingpynrung kyrteng yn pynlong beit ha ka 15 tarik ha ka por 5:30 mynstep thik. Kumta la khot sngewbha ïa baroh kiba kwah ban ïashim bynta tang napoh ka district sha kane ka jingïamareh thong. Ki bor pynïaid ki la pynkhreh ruh ïa ki khusnam pisa na ka bynta ki nongjop ha kane ka jingïakob mareh.
