Imphal, Nailar:
Ki pulit jong ka Manipur ki la ïoh ban kurup ïa ki tiar siat ba la shah lute na Churchandpur bad Bishnupur distrik, la ïathuh u heh pulit jong katei jylla. U heh pulit u la ong ba ka la don ka jingïasiat kaba jur kaba la jia hapdeng ki shipai ïada ri bad ki riewkieng atiar ha ki thaiñ Kwakta bad Terakhongsangbi kiba don ha Bishnupur distrik bad ha ki thaiñ Mualngat, Gothol, Pholjang jong ka Churachandpur distrik.
Na ka liang jong ki shipai ïada ri ki la pynphai kylla ïa ka jingsiat bad pynher krad ïa ki riewkieng atiar. Hadien ka jingïasiat, ki pulit ki la lap ïa ki 9 tylli ki tiar siat kiba la shah tuh na kine ki thaiñ kiba don ha kine ki ar tylli ki distrik.
