Jowai, Nailar 10
Ka Madan Kynsaw Mawkyndeng, Mookaswan Dongwah bad Mukhla Umlangchor ki la khur jingjop ha ka lympung ïalehkai Third Division Football Tournament na ka bynta ka 3rd Adelbert Memorial Trophy ba la pynïaid da ka West Jaiñtia District Sports Association (WJDSA) hadien ba ki la khur jingjop ha ka sngi Palei ha Kiang Nangbah Stadium kaba ha Ladthadlaboh, Jowai.
Ha ka jingïakhun kaba nyngkong, ka Madan kynsaw Mawkyndeng ka la pynliem noh ia ka Tympang da 4-0 kol.
Naduh kaba sdang ka jingïakhun, la ong baroh ar kynhun ki la pyrshang ban ïakhun tyngeh, hynrei ka Madan Kynsaw Mawkyndeng ka long kaba khlaiñ ha ka rukong ïalehkai ha kaba u Iowmainki Lamare u la ïoh ban pynkhih jar nyngkong ha ka minit 31.
Hadien hynñiew minit ka Madan Kynsaw ka la pynbud ïa ka kol ba ar lyngba u Leonard Passah. Ha ka kylla miet kane ka kynhun ka la ïoh ban thep biang sa ar kol lyngba u Two Pillar Tang (52) bad u Dame chan I Sayoo (54) na ka bynta ban khur syndon ïa ka jingjop.
Ha ka jingïakhun kaba bud, ka Mookaswan Dongwah ka la pynliem noh ïa ka FAM lyngba ka shi kol ba la thep da u Ion Phawa ha ka minit 50.
Haba phai sha ka jingïakhun kaba khatduh, ka Mukhla Umlangchor ka la jop da 2-0 kol ïa ka Da-I-Hi SC Mynsngat. Ïa kine kol la thep da u Niawkor Sari ha ka minit 24 & 70+3.
Ka jingïalehkai ha ka sngi Thohdieng kan long hapdeng ka Madanthad Thadmuthlong pyrshah ïa ka Royal Pole Mihmyntdu ha ka por 12 baje mynsngi, katba ka Kseh Sylle Ïalong pyrshah ïa ka Pasyih Cultural ha ka por 2 baje noh phai sngi.
