Raphael Warjri
Katto katne ki synrop-ktien ter-ly-ter kiba thew ïa kawei ka pasoh jynthoh ha ka shidkhot lah ban jer Dkhot ba ha ka ktien phareng kaba mut ‘Paragraph’ lane ‘Verse’ ne ‘Stanza’. Ka ktien ‘Paragraph’ ka ïadei bad ka lyngkhot ktien jynthoh kaba long lynter taid kum ka jingbatai ïa kano ka mat jingkren, bad kum ïa kata ka lyngkhot ktien ba kynthup shibun ki dkhot lah ban jer ‘Thohlyngkien’ ba kit jingmut ha ka ktien phareng ‘Prose’ bad la jer ‘Thohmiat’ kaba kit jingmut ha ka ktien phareng ‘Poem’ ne ‘Poetry’. Ha ka thohlyngkien lah ban don shidkhot lane bun dkhot ba la jer kumta namar ba dei ka jynthoh ba la shu thoh ban lynkien haduh ban da kut ka khana katkum ka mat ba thoh, ba lah ban jer Mat-thoh kaba kit jingmut ha ka ktien phareng ‘Subject’ ne ‘Topic’. Ha ka thohmiat pat lah ban don arsyrtap ki shisynropktien ne bun syrtap katkum ba mang hi ki nongthoh ban pynlong shidkhot, bad lada shidkhot ne bun dkhot ka jynthoh ha ka thohtara kan long pura ka matthoh ba ki nongthoh kin jer kyrteng kyrpang artat ba kit jingmut ha ka ktien phareng ‘Title’. Kata ka mut ka kyrteng jong ka thoh lyngkien ne ka thohmiat. Ka dkhot ha ka Thohlyngkien bad ka dkhot ha ka Thohmiat ki iapher namar ha ka Thohlyngkien ym don jingthew ïa ka jingbun ki kyntien, hynrei ha ka Thohmiat ka dei ban da don ka jingsngewthuh katkum ki shnok ha ki tara bad katta ang. Lehse don ki ba ym pat sngewthuh ïa ka ktien ang ka dei kaba kit jingmut ha ka ktien phareng ‘line’. Ka ktieng ‘Ang’ ka dei ka ktien kaba kit bun ki jingmut kum ïa ka ktien ba thoh ha la ki syrtap lane ïa kaba pruid dak na u pud u sam ‘Line’, ïa ka ktien ba ïeng ne shong lynter ki briew ha kaba khreh la ka pali, kaba kit jingmut ha ka phareng ‘Queue’. Kine ki ktien ki long tang ba tyrwa ai jingmut bad ka shong ha ki paidbah lada pdiang ne kyntait ryngkat kaba kubur da ka iktiar na ka sorkar bad shlem ka thoh ka tar.
Ka ktien miat te lehse bun ki ia tip, hynrei ka jingmut ba jylliew ka dei ban parpaiñ ha ka janor jong ki paidbah ban sngewthuh shai ïa ka katkum ba ka khiathew kata ka ktien. Lah ban shu pynkynmaw ba ha ka kot shaphang ka thohdur Khasi, la kdew ba ka ktien miatdur ka kit jingmut ‘aesthetics’ ha ka ktien phareng na ka bynta ki dur ba thoh ki barikor. Ka ktien Myllung wat lada ka jingmut ka dei synlar ba lung mynsiem, hynrei ha ka thoh ka tar Khasi la pdiang salonsar bad ka khia thew ba ka thmu ïa u riewtbit ha kaba thohmiat ba ha ka ktien phareng ka dei ‘Poetry’ ne ‘Poem’. Kine kiba la kdew hashwa ki dei ha ka thohlyngkien (prose) bad ha ka thohmiat (poetry) pat ka don la u diengkot lajong ban thew ban woh ha ka rukom thoh bad pynshong kyntien katkum ba thoh ki myllung (Poet). Katkum ka san ka mer jong ka thoh ka tar, ki myllung kiba thoh-miat ka mut ïa ki jynthoh kiba miat ka sur ktien bad snah haba kren, kata ka mut kum ka pasoh khia thew ha ka ktien phareng ‘Aesthetics’ haba ong Thohmiat ka kdew kyllum ïa ki jynthoh jong ki myllung. Kumta lada dei ban pynpher hapdeng ki thoh-miat ba don tara (rhyme) bad ba ym don tara (free verse) lah ban kdew noh ‘thohmiat’ ban long salonsar kynthup naphang bad ‘thohmiatara’ ïa ki jynthoh ba biang tara. Na kata ka daw ïa ka sur biang tara ba lah ban jer Surtara ka ba kit jingmut ha ka phareng ‘Rhythm’.
Ha ka jingshisha lah ruh ban jer thohsur, hynrei kane ka ktien Thohsur ka kham ïahap bad kaba thoh jingrwai, kaba ïa ryngkat bad ka ktien phareng ‘Lyrics’ lane ‘Songwriting’. Kumta ia ki riewtbit ha kaba thohsur, thohmiatara bad thohmiat lah ban ñiew kyllum kum ki myllung kata ka mut ha ka ktien phareng ‘Lyricist’ bad ‘Poet’; bad ïa ki riewtbit thoh jingrwai ryngkat ka sur lah ban jer Thohrwaisur ne Thohsurrwai kaba ryngkat bad ka ktien phareng ‘Songwriter’ lane lah ban pdiang kyllum kum ki Myllung. Ha ba shim salonsar baroh kita ki nongthoh kiba shem mynsiem bad ktik ka janor ban thaw ki ktien kiba snah na ka bynta kiba sngap bad pule, barabor hi ki don ka jingmut kaba khia thew ba lah ban kynthup kyllum kum ki Myllung. Hynrei hapdeng kita la don ruh ki nongthoh kiba pur khana ïa ka jinglong jingman ha ka imlang sahlang lane ha ka jingïadei para briew kiba ym da don eh kita ki kyntien ba khia thew lane ki ban ktik ïa ka jingmut jingpyrkhat jong ki briew, lane ki ban ktah jylliew ïa ka dohnud briew kumta ka shong ha ki akhia ka thoh ka tar ban rai halor kane ka bynta.
Ha kaba ïadei bad ki nongthoh ka la don ka sien ba ki riew tymmen na ka thaiñ ka ba dang sngur ka pyrkhat pyrdaiñ bad dang nylla ka rukom pyndonkam ïa ka ktien ha ba kren, ka la mih ka ktien Thohjer Thohnam. Haba la pynshong nongrim ïa kita ki ktien lah ban sngewthuh ba kita ki riew tymmen ki thmu ban kdew ïa kita kiba thoh kot kiba ïapher na kiba thoh sla. Kumta ka la pashat jingmut ba ka ktien thoh-jer thohnam ka kdew ïa ki nongthoh kot ha ka pule dangle jong ka juk mynta, kaba kynthup ïa ka thoh kot ban pulr byrngia ne ka thohkot ban pule ha ki shlem hikai ban nang ban tbit ha la ka kam. Kumba la kdew barabor kane ka long tang ka tyrwa ai jingmut ha ki paidbah la kin pdiang ne kyntait bad ba ki iktiar sorkar ne na ki shlem ka thoh ka tar ki lah ne em ban kubur.
