Shillong, Nailar 10
Ka Real Madrid ka la ïakynduh mawsiang ha shwa ban sdang ka aïom ïalehkai La Liga 2023/24 namar u rangapkol ka klob u Thibaut Courtois u la ngat jingmynsaw ha ka khohsiew kadiang.
“Hadien ba la dep ban bishar biang ïa u Thibaut Courtois, la lap ba u la mynsaw ka khohsiew kadiang bad un hap ban shah sumar ha kine ki khyndiat sngi,” la pynbna kane ka klob na Spain ha ka Sngi Palei.
Kat kum ki kaiphod, utei u rangapkol u la mynsaw ha ka por ba u dang kilanmet bad u la kyllon ha madan. La pynthikna ba u la mynsaw ka khohsiew (ACL injury) bad ka long kaba eh ban batai haduh lano une u rangïalehkai un wanphai biang sha ka jingïalehkai.
Ka jingmynsaw utei u rangapkol ba kynsai ka la buh jingeh ïa ka kynhun ïalehkai jong ka Real Madrid ha kaba kan mih madan mynta ka aïom khlem utei u rangïalehkai na Belgium.
Kane ka kynhun kaba khur ïa ka nam lahduh haduh 14 sien ha ka Champions League kan sdang ïa ka jingïakhun kaba nyngkong pyrshah ïa ka Athletic Bilbao ha ka Sngi U Blei.
Ki khubor ki ïathuh ba ka Real Madrid ka la pynkhreh ban rung sha ka ïew thied ïathied rangïalehkai na ka bynta ban ïoh rangapkol ba thymmai bad kane kan shong lada ym lah ban ïadon lang u Courtois.
U Benzema, uba long u rangïalehkai ba kynsai bad uba la ïohpdiang ïa ka khusnam Ballon d’Or ha ka aïom ba la dep, u la leit ïalehkai noh sha Saudi Arabia. Kumta katei ka kynhun ba khlaiñ bor na Spain ka dang pynkhreh mynta ban pynmih bujli da uwei pat rangïalehkai ha ka jaka jong u.
Tang hapoh shi taïew shwa ban sdang kane ka aïom, ka kynhun ïalehkai jong ka Real Madrid ka la kynthup tang saw ngut ki rangïalehkai shakhmat bad tang uwei uba kham biang napdeng jong ki.
Kumba ka paw ka Real Madrid ka la pyrshang ban soi ïa u Kylian Mbappe, hynrei kam shym la urlong ban mynjur ïa ka jingïateh soskular na ka bynta utei u khlur ïalehkai na France. Kane ka klob kan hap ban ap tat haduh ban kut ka kontrak bad ka Paris Saint-Germain khnang ba ka lah ban wanrah ïa u sha Santiago Bernabeu.
Kat ïa mynta, ka Real Madrid ka la ïoh ban soi tang u Joselu uba shu shim wai na ka Espanyol. Une u rangïalehkai shakhmat ba la 33 snem ka rta u dei uba la ju ïoh ban mihkhmat man ka por na ka bynta ka kynhun ïalehkai jong ka Spain. Namar kata, une u rangïalehkai un ïasoh lang ryngkat u Vinicius Junior bad u Rodrygo, kiba long ki rangïalehkai ba dang khynnah bad kynsai na Brazil.
