Taipei, Nailar:
Ka tnat Iada Ri jong ka Taiwan ha ka Sngi Balang ka la iathuh ba ka la iohi biang ia 10 tylli ki liengsuiñ jong ka Russia kiba leit rung shapoh ka ‘Defence Zone’ jong ka Taiwan ha katie ka sngi. Nalor jong kitei ki liengsuiñ thma, ki la don ruh sa kumba 5 tylli ki jhad thma kiba la pynkhreh bad kiba leit syntiat nabar jong ka Taiwan.
Ka Taiwan ka la ujor na ka por sha ka por ba ka China ka leit ban pynthud bad wanrah jingma ia ki paidbah katei ka ri dew lynnong kaba rit mynta la kumba 3 snem eiei. Katba ka China pat ka ju kam trai man ka por bad ka ju ong ba katei ka dew lynnong ‘Taiwan’ ka dei hi ka bynta ba shu pait na ka ha ki por ba la leit bad kumta kan sa shim biang sha lade ynda ka la sngew dei ban leh kumta.
Ka tnat iada jong ka Taiwan ka la iathuh ba ka Taiwan ka la sdang ban iohi ia kitei ki liengsuiñ jong ka China naduh ka por 9 baje jong ka step Sngi Balang bad kumba 25 tylli kiwei pat ki jet thma ka China ki dang kilan bad pyntbit ha ka duriaw kaba don shabar ka Taiwan. Kitei ki liengsuiñ thma ka China ki kynthup ia ki jet J-10 & J-16 bad kumjuh ruh ki jet pynhap bom H-6.
Napdeng jong kitei ki liengsuiñ thma kiba dang kilan bad pyntbit ha katei ka duriaw ba shabar ka Taiwan, 10 tylli pat ki la leit iaid bad rung be-aiñ sha u pud- u sam jong ka Taiwan Strait bad ki la leit rung ruh sha ka phang Southwest jong ka jaka pynher liengsuiñ jong ka Taiwan.
Kumjuh ruh ha ka Sngi U Blei, la ong ba ka Taiwan ka la iathuh ba la iohi ia ka jingdon jong ki liengsuiñ thma bad ki jhad thma jong ka China ha khappud ka Taiwan.
