Shillong, Nailar 10
Ka Galaxy Junior FC ka la jam sha ka quarter final ha ka lympung ïalehkai Football Knockout Tournament 2023 ba la pynïaid da ka Ri Khasi Social & Cultural Sports Club.
Kane ka jinglah ban pynthikna ka la wan hadien ba ka lah ban pynliem noh ïa ka Beneris FC lyngba ka tie-breaker da 5-4 kol ha ka sngi Palei ha madan Kurkalang kaba ha Bhoirymbong.
Ha kane jingïakhun jong ka pre-quarter final baroh ar ki kynhun ki la pyrshang ban ïakhun tyngeh naduh kaba sdang, ha kaba ki la ïoh ïa ki katto katne ki kabu kiba biang, hynrei kim shym la lah ban thep haduh kaba kut ka jingïalehkai.
Dei ha ka jingïashut tie-breaker ba ka Galaxy ka la lah ban pynurlong ïa ka jingjop ha kaba ka la lah ban thep da 5-4 kol ïa ka liang pyrshah.
Ïa ka nam ‘Man of the Match’ la khur da u rangïalehkai ka Galaxy u Milancy Khongstia bad ïa kane ka khusnam la sam da u Bah P.B Sylliang uba dei u Secretary jong ka Synjuk ki Rangbah Shnong jong ka Ribhoi.
