Jowai, Nailar 10
Ka Demthring ka la long sa kawei pat ka kynhun kaba la jam sha ka semi final ha ka lympung ïalehkai Independence Day Cup Under-17 Football Tournament ba la pynïaid da ka West Jaiñtia District Sports Association (WJDSA).
Kane ka jinglah ban pynthikna ka la wan urlong hadien ba lah pynliem ïa ka Evergreen Mukhla da 2-0 kol ha ka jingïakhun quarter final kaba la long ha ka sngi Palei ha U Kiang Nangbah Stadium Ladthadlaboh, Jowai.
Naduh kaba sdang ka jingïalehkai, ka Demthring ka la ïakhun tyngeh ha kaba ka la ïoh ban pynkhih jar nyngkong eh lyngba u Olanroi Suting ha ka minit kaba 4. Hadien katto katne por une u rangïalehkai u la pynbud biang ïa ka kol kaba ar lyngba u 27.
Wat la ki rangïalehkai ka Evergreen Mukhla ki la pyrshang ban ïakhun tyngeh, hynrei haduh kaba kut ka jingïalehkai kam shym la lah ban pynurlong bad ka la mad ïa ka jingshah rem.
Nalor ka Demthring, kiwei pat ki kynhun kiba la rung sha ka semi final ki long ka Mulang Ïalong, Mukhla Raij bad ka Dulong.
Ka jingïakhun semi final kan long ha ka sngi Saitjaiñ (12 tarik) hapdeng ka Mukhla Raij pyrshah ïa ka Mulang Ïalong ha ka por 1 baje nohphai sngi bad ka Dulong ïa ka Demthring ha ka por 3:30 janmiet.
