UK, Nailar:
Ha kawei ka video ba la saphriang paidbah ha ki rynsan Social Media, la iohi ia kawei ka khynnah rit kaba la shah rong ha ka um bad shah kit sha duriaw katba ka dang ïalehkai hajan um bad la ki paralok ha Devon jong ka United Kingdom. Hynrei ka long kaba donbok ba katei ka khynnah ka la lait-im da ka jingiarap jong uwei pat u briew uba leit ban tur wat hapdeng ki jing-at phyllung ka duriaw haduh ba un da poi sha ka.
Ka tnat North Devon Council ka la pyllait paidbah ia katei ka video khnang ban pyni nuksa ia ki paidbah ba kin phikir bha ia ki khun-ki kti lajong bad ba kin ym pyllait ia ki khynnah rit ban leit tur ne ban leit lehkai hajan ki um duriaw kumba long ha katei ka jingjia, namar ym lah ban tip ha kano ka por ba kaei- kaei kaba sniew ka lah ban wan jia ia ki.
Kane ka la jia hapoh Ilfracombe Harbour ha ka janmiet Sngi Palei bad ka jingma kaba khraw ka la ap ia katei ka khynnah lada ym dei na ki briew kiba kloi ban pyrkhat bad kiba kloi ban iarap ia ka ha katei ka jingjia.
Katei ka video ka dei kaba la ioh ban ring ha ka por kumba 7 baje janmiet ha ka 3 tarik u Nailar.
Kumjuh ruh ia kitei kiwei ki khynnah kiba don ha katei ka jaka ha ryngkat bad katei ka khynnah, ha kaba kitei kiwei pat ki shu shah rah tang hajan bad ki la shu mong bad mynsaw malu- mala bad la ai jingsumar ia ki da ki briew jong ka tnat RNLI na Ilfracombe ha katei hi ka sngi.
