Shillong, Nailar 10
Ka Manchester City kaba dei ka lahduh jong ka aïom ba la dep ha ka Premier League kan sdang ïa ka jingïalehkai kaba nyngkong pyrshah ïa ka Burnley ka ban long shabar na la ïing ha ka miet synñia jong ka sngi Saitjaiñ na ka bynta ban pynkhreh kum ka kynhun kaba nyngkong na England ban long kum ka lahduh kaba jop saw sien lynter.
Katba ka Arsenal kan sdang ïa ka jingïaid lynti ha kane ka aïom bathymmai da ka jingïakhun nyngkong ha la ïing pyrshah ïa ka Nottingham Forest ha ka janmiet jong ka sngi Saitjaiñ.
Ka Liverpool bad ka Chelsea ki bym shym la lah ban ïalehkai bha ha ka aïom ba la dep, kin ïakhun pyrshah ha Stamford Bridge ha ka Sngi U Blei.
Kumba ka paw ka City ka dang long ka kynhun kaba khlaiñ bor namar ha ka aïom ba la dep ka la lah ban pynurlong kum ka kynhun kaba nyngkong na England ban rah ïa ka nam lahduh ha ka Champions League, Premier League bad FA Cup.
Kumba ka paw katei ka kynhun hapoh ka jingïalam u Pep Guardiola kan mih madan khlem u kapten u Ilkay Gundogan uba la leit ïasoh sha ka Barcelona bad u Riyad Mahrez uba la leit ïalehkai sha Saudi Arabia.
Te kumta ka City kan hap ban ïakhun ban dang ïai pynneh ïa u Kyle Walker bad u Bernardo Silva, katba ar ngut ki rangïalehkai na Croatia, kata u Mateo Kovacic bad u Josko Gvardiol ki long kiba dang pynïasoh thymmai sha kane ka klob.
Ha kawei pat ka liang ka Burnley ka don ïa u coach uba kynsai u Vincent Kompany, uba lah ban pynurlong ïa ka kynhun ha kano-kano ka por. Ha ka por kaba lyngkot, une u kapten barim ka Belgium u la shimti ïa ka Burnley ban pynïaid ha ki hynñiew tylli ki jingïakhun ba dangsah jong ka Premier League ha ka aïom ba la dep.
Pynban ka Burnley ka la lah ban pynpaw ïa ka jingtbit na ka bynta ban ïai neh haduh hynriew tylli ki aïom ha kane ka kyrdan ïalehkai ba hakhlieh hapoh ka jingïalam u Sean Dyche hapdeng u 2016 bad 2022.
“Nga ju kwah ban ïalehkai man la ka taïew man la u bnai bad man la u snem pyrshah ïa ka kynhun kaba kynsai kum ka Manchester City namar ka long kaba biang eh ïa ka kynhun ba kan nangkiew shaphrang,” la ong u Kompany.
Namar kata, ka Burnley ka khmih lynti ban ïalehkai bha ha kane ka jingïakhun kaba nyngkong pyrshah ïa ka City namar ka la shah rem teng ha kane ka klob haduh 6-0 kol ha ka quarter-final FA Cup jong ka aïom ba la dep.
