Shillong, Nailar 10
Ka nongïalehkai ïalympat ka ri, ka Anita Sheoran kan ïakhun pyrshah ïa u Sanjay Kumar Singh na ka bynta ka kam president ha ka Wrestling Federation of India (WFI), ha ka ilekshon ka ban long ha ka sngi Saitjainñ.
Ka Anita kaba long ka nongjop ha ka Commonwealth Games 2010, ka dei kaba la sakhi pyrshah ïa u nongïalam barim ka WFI u Brij Bhushan Sharan Singh uba la shah kynnoh donkti ha ki kam jrong kti ïa ki kynthei. U Sanjay Kumar Singh un dei u kyrtong na ka bynta katei ka kam president.
U Darshan Lal ïa uba la ïoh jingkyrshan na u Brij Bhushan bad u Secretary ka Railways Sports Promotion Board u P.C. Locab, uba la ïadon bynta ha katei ka jingïakhun, kin ïakhun na ka bynta ka kam secretary-general. Kane ka long katkum ka thup ba la pyllait ha ka Lah Sngi U Blei hadien ba la pynkut noh ïa ka jingthep kyrteng ha ka sngi Saitjaiñ.
U Satya Pal Singh Deshwal, uba la khmih lynti ban ïoh bat biang ha ka sien kaba ar, un ïakhun pyrshah ïa u Dushyant Sharma na ka bynta ka kam treasurer.
Ki ar ngut ki kyrtong na ka bynta kam senior vice-president, san ngut na ka bynta saw tylli ki kam vice-president, saw ngut na bynta ar tylli ki kam Joint Secretary bad hynñiew na ka bynta san tylli ki kam executive member.
