Jowai, Nailar 11
Ka lympung ïalehkai Third Division Football Tournament na ka bynta ka 3rd Adelbert Memorial Trophy ba la pynïaid da ka West Jaiñtia District Sports Association (WJDSA) ka la nang jam shaphrang ha kaba 16 tylli ki kynhun ki la jam sha ka pre-quarter final.
Kine ki kynthup ïa ka Risingsun Mukhla, Mukhla Umlangshor, Newhill, Mookaswan Dongwah, Lumbhahdakha, Madan Thadmuthlong, Mookyrdup, Lutituber, Lumkhangdong, Pateinki Sabah, Mulang Ialong, Moodop Royal, Madankynsaw, Myrjai, Da-i-Hi-Mynsngat bad Iooski Youth Walfare.
Ha ka jingïalehkai kaba khatduh jong ka wat kaba nyngkong kaba la long ha ka sngi Thohdieng ha Kiang Nangbah Stadium Ladthadlaboh Jowai, ka Madan Thadmuthlong ka la pynliem noh ïa ka Royal pole Mihmyntdu da 3-1. U Precious Tang u la thep ar kol ha ka minit 5 & 27 bad u Samsauru Papiah ha ka minit ba 45. Katba ïa ka shi kol jong ka Royal Pole Mihmyntdu la thep da u Marsowki Suchiang ha ka 70+1 minit hashwa ba kan mad ïa ka jingshah rem.
Ha ka jingïakhun kaba bud, ka Pasyih Cultural ka la pynliem ïa ka Kseh Sylle Ïalong da 3-2 kol. Ïa ki kol jong ka Pasyih la thep da u Wansaki Rymbai ha ka minit kaba 56, u Armi Siangshai (59) bad u Ïaineh Suchiang (65). Katba ki ar kol jong ka Kseh Sylle la thep da u Iahluti Dhar (7) bad u Niawki Phawa (67).
Na ka liang ki bor pynïaid ki la pynbna ba ïa ka jingïakhun pre-quarter final yn sdang naduh 14 tarik hapdeng ka Risingsun Mukhla pyrshah ïa ka Mukhla Umlangshor ha ka por 10 baje mynstep. Ka Newhill pyrshah ïa ka Mookaswan dongwah ha ka por 12 baje mynsngi, ka Lumbhahdakha ïa ka Madan Thadmuthlong ha ka por 1:30 nohphai sngi bad ka Mookyrdup ïa ka Lutituber ha ka por 3 baje janmiet.
