Shillong, Nailar 11
Da ka jingthmu ban ym pynmynsaw hapdeng u briew bad ki hati ha ki ar tylli ki jylla jong ka Meghalaya bad Assam, la pynlong ïa ka jingïalehkai phutbol paralok hapdeng ka DFO Goalpara Division, Assam bad ka Garo Hills Forest Department kaba dei ka sngi rakhe ïa ka World Elephant Day ha ka sngi Thodieng ha North Garo Hills.
Kane ka long ka sien kaba nyngkong eh ban pynlong ïa kane ka lympung bad la thmu ban pynlong man la u snem ïa kaba la tip kum ka ‘Elephant Cup’.
Ha kane ka prokram la ïadon lang u Deputy Commissioner ka Goalpara u Kharindra Choudhury kum u kongsan ha kaba la ïadon lang ki heh ophisar na ka Meghalaya bad kumjuh na Assam.
Lah ban kdew ba ïa ka World Elephant Day la ju rakhe ha ka 12 tarik u Nailar man la u snem. Hynrei na ki daw bym lah kiar la hap ban pynlong shi sngi shwa ban rakhe ïa ka. Kane ka jingrakhe ïa ka World Elephant Day ka long shi bynta ban pynneh pynsah ïa ki hati bad ban ïasam ïa ki jingnang jingtip sha ki paidbah halor ka jingdonkam kumno ban ai ka jingïada ïa ki.
Ha kane ka sngi la pynlong ruh ïa kiwei pat ki prokram bapher bapher ha kaba ki nongshong shnong khappud jong ka Meghalaya bad Assam ki la ïashim bynta.
Ha ka sngi Thohdieng la pynlong ïa kane ka prokram ha ryngkat ka jingïasnoh kti lang hapdeng ka DFO Goalpara bad ka DFO Tura kaba la kyrshan lang da Aranayak, kaba long ka seng trei mon sngewbha ban pynneh pynsah ïa ki hati bad ki jingthaw ba im kiba la sdang ban duhjait.
