Ha ka sien nyngkong rung semi final ka Spain, pynliem ka Sweden ïa ka Japan

Shillong, Nailar 11

Ka Spain ha ka sien kaba nyngkong eh ka la jam sha ka semi final Women’s World Cup 2023 hadien ba lah pynliem noh ïa ka Netherlands da 2-1 kol ha ka extra-time ha ka sngi Thohdieng ha Wellington Regional Stadium.

       Kane ka nam jop ka la wan urlong lyngba ka Salma Celeste Paralluelo Ayingono, kaba la ïoh ban thep kol ha ka minit kaba 111 jong ka extra time hadien ba kine ki kynhun ki la ïakhaid haduh kaba kut ki 90 minit.

       Kane ka long ka por ka bym poi pyrkhat namar dangshen ha ka jingïalehkai (group stage) ka Spain ka la shah rem ha ka Japan haduh 4-0 kol ha ka World Cup.

       “Barobor ngi ju angnud ban pynurlong na ka bynta ban kynjoh sha ka thong,” la pynpaw u Jorge Vilda kum u coach hadien ba ka Spain ka la khur jingjop ha ka quarter final pyrshah ïa ka Netherlands.

       “Ngi la lah ban pynurlong na ka bynta ban jam sha ka semi final ha ka sien kaba nyngkong eh. Mynta ngi la long kawei na ki saw tylli ki kynhun ba kynsai ha ka pyrthei, hynrei ngin ym sangeh na kane ka jingïakhun. Mynta ngi ïalehkmen, hynrei lashai ngin hap ban pynkhreh ïa ka jingïakhun semi final namar ngi kwah ban jam shaduh ka final.”

       Kumba ka paw na katei ka jingïakhun quarter final baroh ar kynhun ki la ïakhun tyngeh naduh kaba sdang, hynrei kim shym la lah thep kol. Dei ha shwa ban kut ka jingïalehkai ba ka Spain ka la ïoh ban pynkhih jar nyngkong lyngba ka penalty ba la shut da ka Mariona Caldentey hadien ba kawei na ki ’thei ïalehkai ka Netherlands ka la kum pyndei da ka kti ïa ka bol hapoh box.

       Hynrei ka Netherlands ka la lah ban pynïakhaid kylla lyngba ka Stefanie van der Gragt ha ka minit kaba 90+1. Ka Spain ka la lah ban pynurlong ha ka extra time lyngba ka Salma Paralluelo ha ka minit kaba 111 na ka bynta ban khur syndon ïa ka jingjop.

       Haba phai sha kawei pat ka jingïakhun quarter final kaba la long ha Eden Park, ka Sweden ka la pynkut noh ïa ka jingïaid lynti ka Japan ha kane World Cup hadien ba pynliem da 2-1 kol.

       Ha kane ka jingïakhun ka Sweden ka la ïoh ban pynkhih jar nyngkong eh lyngba ka ’thei ïalehkai ‘dien ka Amanda Ilestedt ha ka minit kaba 32. Ïa ka kol kaba ar la thep ha ka kylla miet lyngba ka penalty da ka Filippa Angeldal (51)

       Hashwa ban kut ka jingïalehkai ka ’thei ïalehkai ka Japan ka Riko Ueki ka la pynlehnohei ïa ka penalty ha ka minit kaba 76, hynrei ka Honoka Hayashi ka la lah ban pynurlong ha ka minit kaba 87 hashwa ba kan mad ïa ka jingshah rem.

       “Ka long kaba phylla ba ngi ka la lah ban pynurlong ïa ka jingjop,” la pynpaw u coach ka Sweden u Peter Gerhardsson.

       “Ka Japan ka dei ka kynhun kaba kynsai ha kane ka lympung, hynrei ngi la lah ban pynurlong ïa ka jingjop.”

       Ha ka Tokyo Olympics, ka Sweden ka la lah ban pynliem teng ïa ka Japan ha la ïing ha ka quarter-final. Ka Sweden kaba la don jingkyrmen ban khur ïa ka takma ksiar, hynrei ka la shah rem noh ha ka Canada.

       Kumba ka paw ka Sweden kam pat ju lah ban khur ïa ka nam lahduh la ka long ha ka World Cup ne ha ka Olympics.

Lyngba kane ka jingjop ka Spain kan ïakynduh semi final bad ka Sweden ha ka 15 tarik mynta u bnai.