Washington, Nailar:
Hashwa ka jingleit jurip jong u President ka United States sha ka thaiñ West, la ong ba ki heh ka FBI ha ka Sngi Balang ki la iathuh ba ki la ioh ban siat iap noh ia uwei u briew na Utah uba byrngem bad buh jingma ia ka jingim jong u Biden.
Ka Federal Bureau of Investigation (FBI) ka la pyntikna ba utei u runar u la shah siat iap ha ka por ba ki briew na jong katei ka kynhun ki dang pyrshang ban shu kem ia u, na ka bynta ki jingtohkit ba bniah.
Ia utei u briew, la ithuh kyrteng kum u Craig Robertson bad la jer kyrteng ia u hapoh ka ejahar ba la ujor da ki bor pyniaid na Utah.
Katkum katei ka ejahar, la ong ba u Robertson, uba ha ki rta ba 70 snem, u la pynithuh ialade kum u ‘MAGA Trumper’ bad u la byrngem ia u President ka US na ka por- sha ka por lyngba ki jingthoh jong u hapoh ki Social Media.
U Robertson ha kane ka taiew u dang pyllait ia ka jingthoh ba u ioh jingtip ba u Biden un sa leit ban iuh kjat ha Utah bad un ap ia u hangta.
