Shillong, Nailar 11
Ka Shooting Association of Meghalaya (SAM) kan sei palat 25 ngut ki nongsiat suloi ki ban ïashim bynta ha ka lympung ïakob siat suloi ba la tip kum ka 10th North East Zone Shooting Championship ka ban long ha kane ka nongbah.
Ïa kane ka lympung yn sdang naduh 20 haduh 27 tarik mynta u bnai ha Assam Regimental Centre, Happy Valley, Shillong. Kumta la khmih lynti ban wan ïashim bynta kumba 260 ngut ki nongïalehkai na ki hynriew tylli ki jylla jong ka thaiñ shatei lammihngi.
Nalor ka Meghalaya, kiwei pat ki jylla ki kynthup ïa ka Assam, Manipur, Mizoram, Nagaland bad ka Arunachal Pradesh ki ban shim bynta ha ka Under-21, Under-19, bad Under-16.
Haba pynpaw ha ki lad pathai khubor ha ka sngi Thohdieng, u President ka SAM u Bah John F. Kharshiing u la ïathuh ba kane ka lympung ïakob siat suloi ka dei ka sien kaba ar ban pynlong ha kane ka nongbah. “Ngi la ïoh ban pynlong nyngkong eh ha u snem 2016, hynrei mynta ngi la ïoh biang ïa kane ka kabu ksiar ban pynlong ïa kane ka lympung ïakob siat suloi kaba don burom hapoh ka jingkhmih jong ka National Rifle Association of India bad yn kyrshan lang da ka tnat ïalehkai jong ka Sorkar jylla.”
Ki jingïakob siat ha kane ka lympung ki kynthup ïa ka 10m rifles & pistol, 25 m pistol, 50m rifle open sight & peep sight bad ka 50m pistol na ka bynta ki shynrang bad kynthei.
“Ha kane ka lympung kin don kumba 260 ngut ki nongïashim bynta na baroh hynriew tylli ki jylla. Ha ka jingshisha ka Jylla ka don palat ïa 45 ngut ki nongïalehkai siat suloi, hynrei ki la don tang 25 ngut ki ban ïoh ïashim bynta namar ban ïoh rung sha kane ka lympung donkam ban ïakhun ban ïoh ïaknieh rung,“ u la bynrap.
Namar kata, na ka liang ka synjuk ka la khmih lynti ba kitei ki nongïalehkai kin ïalehkai bha khnang ba ki lah ban wanrah burom ïa ka Jylla hi baroh kawei.
Ha kane kajuh ka sngi la pyllait ruh ïa ka shap (logo) jong kane ka lympung da u President lem bad u General Secretary ka synjuk u Bah Neil Suting ha ka jingdon lang ruh u Bah Nicholas J.J Nongkhlaw, Publicity & Media Secretary ryngkat ki khynnah ïalehkai.
