Shillong, Nailar 11
Ka kynhun ïalehkai jong ka shlem treikam ka Accountant General (AG) ka la rah ïa ka nam lahduh ha ka North Eastern Council Invitational Football Tournament 2023 kaba long ka jingrakhe ka ri India ïa ka snem kaba ar jong Amrit Ka Mohatsav.
Kane ka nam jop ka la wan hadien ba ka lah pynliem noh ïa ka Meghalaya Energy Corporation Limited (MeECL) da 3-0 kol ha ka jingïakhun final kaba la long ha ka sngi Thohdieng ha SSA Stadium, Polo.
Ha kane ka lympung la wan ïashim bynta da 9 tylli tylli ki shlem treikam.
Haba phai sha ka jingïalehkai, la ong naduh kaba sdang baroh ar kynhun ki la pyrshang ban ïakhun tyngeh ha kaba ym shym la don satia ban ïoh pynkhih jar.
Dei ha ka kylla miet, ka kynhun ïalehkai jong ka AG kaba don ïa ki rangïalehkai kiba ïalehkai na ki klob ka nongbah ha ka Shillong Premier League, ka la ïoh ban pynkhih jar nyngkong eh lyngba u Chandmitre Thma ha ka minit kaba 43.
Kane ka shi kol ka la pynkyndit bynriew ïa ki rangïalehkai ka MeECL, hynrei tang hadien ar minit ka la shah thep biang sa shi kol lyngba u rangïalehkai barim ka Shillong Lajong u Sheen Stevenson Sohktung.
Lyngba kine ki ar kol ka la nang pynshaïong ngaiñ ïa ki rangïalehkai ka MeECL ki bym poi pyrkhat ban shah thep kol biang. Hadien katto katne por ka AG ka la thep biang ïa ka kol kaba lai lyngba u Kerio Nongbri ha ka minit kaba 54. Haduh kaba kut ka jingïalehkai ka MeECL kam shym la lah ban pynphai bad ka la mad ïa ka jingshah rem.
Ïa ka nam rangïalehkai ba kynsai la ïoh da u Sheen Sohktung na ka AG, rangapkol ba kynsai ka leit sha u Shiningstar Basaïawmoit na ka MeECL bad ïa ka nam rangthep kol ba kynsai la ïoh da u Chandmitre Thma na ka AG uba la thep haduh 7 kol ha kane ka lympung.
Ïa ki khusnam sha kine ki kynhun la sam da u Gaigongdin Panmei uba bat kum u Financial Adviser jong ka NEC kum u kongsan, ha ryngkat ka jingdon lang ka Sherry Lalthangzo, Ecnomic Advicer jong ka NEC kum ka symbud kongsan, nangta u Rangbah Shnong ka Nongrim Hills u Bah Bantylli Nari bad kiwei.
