Washington DC, Nailar:
Katkum ki khubor la ong ba u khñiang jingpang Covid ba thymmai- u EG.5 u la sdang ban jur hapoh United States bad u la long kumba 17% na ka jingdon kiba ioh kem pang Covid thymmai hapoh ka ri lada ianujor bad ka 16% kiba ioh pang na u khñiang jingpang barim- u XBB.1.16 ha ki por ba la leit.
Une u khñiang jingpang ba thymmai, la ong ba u dei hi uba kylla dur na u khñiang XBB uba dei hi na kajuh ka iing ki jait khñiang Omicron.
U EG.5, lada ianujor bad ka jinglong jong u XBB.1.9.2 ba la wan mih hashwa jong u, u don ia ka bor ban pynkylla dur ialade ha ka por ka bym lah ban tip. Wat da ki stad saïan bad ki doktor kiba pule bniah shaphang utei u khñiang ruh ki la dep tip lypa ba utei u khñiang u lah ban pynkylla dur ialade hynrei kim shym la phikir ne buh jingmut eiei ba un lah ban ktah jur bad pynkhie biang ia ka khlam kumba long ha ki por ba la leit.
Kumta, la ong ba une u khñiang EG.5 u long uba stet bha ban pur bad u lah ruh ban kylla dur biang.
U Dr. David Ho, u Professor jong ka tnat ‘Microbiology & Immunology’, u la pule bniah bad wad bniah bha halor kitei ki jait khñiang jingpang hapoh ka jaka pule bniah (Lab) jong u ha Columbia University ban iohi haduh katno ka met jongngi ki briew ka lah ban iakhun pyrshah ia utei u jait khñiang jingpang.
Hynrei, u la ong ba une u khñiang jingpang um shym don jingpher na ki jingpang ba lah ban paw shabar kumba long na kiwei pat ki khñiang jingpang kiba wan hashwa jong u ha ki por ba la leit.
