Marseille, Nailar:
3 ngut ki pulit jong ka France ha ka Sngi Palei ki la shah bat noh halor ka jingdon kti ha ka jingiap jong u briew 27 snem ka rta hapdeng ka jingiakhih paidbah ha ki khyndiat por ba la leit. Kitei ki pulit ki la shah pynngat kyndon halor ka jingleh pyrshah ia ka aiñ wat hapdeng ka ‘duty’ jongki.
Katkum ka kaiphod na ka Post-mortem ba la dep ban leh ia ka met jong utei u briew uba iap ha Marseille, la iohi ia ki dak jngem bad dak mynsaw ha ki bynta ka shadem jong u bad ki jingmynsaw ruh ki dei ki dak jong ki kam pynshitom jong ki pulit.
Kitei ki heh pulit ki la shah kem noh ha ka Sngi Ba-ar halor ka jingshah pyniap jong utei u briew ha ka jaka talasi jong ki pulit pyniaid kali hapoh Paris bad kaba la jia ha ka 27 tarik u Jylliew.
Ia utei u briew la ithuh kyrteng kum u Mohamed Bendriss bad u la don iwei i khun, ha kaba ka kurim jong u ka dang pun sa ia iwei pat i khun bad utei u briew u la ioh kem pang kynsan katba u dang ñiah ia ka thuk- thuk jong u bad u la khlad noh khlem da ioh por shuh ban sumar.
Ki briew jong ka tnat tohkit ki iathuh ba ka jingiap jong u ka lah ban long namar ka jingktah jong ki kynja jingbthei ba la kawang bad pynbthei da ki pulit ha ka por ba ki kthong ia u.
Kumta, kitei ki 3 ngut kin shah pynngat ha ki kyndon pynkheiñ aiñ jong ka jing pyndonkam ia ki tiar kiba ktah ia ka koit ka khiah jong ki paidbah.
Hynrei, la ong ba ki bor pyniaid ki la iathuh ba u Bendriss u don kti ha ka jingleit lute ia ki tiar na kawei ka dukan juti bad hadien kata u la shah beh ha kitei ki pulit, ha kaba u la phet krad da ka thuk-thuk jong u.
Dei ha katei ka por ba u dang phet ha lynti, u la shah kawang ha ki pulit da utei u kynja bol ba bthei bad utei u tiar u la dei ia ka thuk-thuk jong u.
Watla katta, la ong ba u Bendriss u la bteng beit ban ñiah ia ka thuk- thuk hynrei dei ha katei ka por ba u la ioh kem pang bad khlad noh syndon.
