
Shillong, Nailar 13
Ka Newcastle United, Arsenal, Brighton, Fulham bad Crystal Palace ki la sdang ïa ka aiom ba thymmai jong ka lympung English Premier League (EPL) da ka jingjop ha ka jingïalehkai kaba la long ha ka sngi Saitjaiñ.
Haba phai sha ka jingïalehkai, ka jinglah ban ïalehkai bha jong u Alexander Isak ka la ïarap ïa ka Newcastle United ban jop da 5-1 kol pyrshah ïa ka Aston Villa kaba la long ha St James Park.
Wat la ka jingsdang jong kane ka jingïalehkai ka la long kaba itynnad bad ïakhaid bha, kata hadien ba ka Newcastle tang ha ka minit ba 6 ka la ïoh ban khyrwit ïa ka kol ba nyngkong lyngba u Sandro Tonali, hynrei ka Aston Villa ruh ha ka minit ba 11 lyngba u Moussa Diaby ka la ïoh ban pynphai ïa kane ka shi kol, kaba la pynshongshit ïa ki nongkyrshan na baroh ar liang.
Hynrei hadien kane, khlem da phai dien shuh, ki rangïalehkai ka Newcastle ki la ïakhun tyngeh bad ban ïoh khyrwit haduh 4 tylli ki kol, kata kiba la wan lyngba u Alexander Isak ha ka minit ba 16 bad 58, u Callum Wilson ha ka minit kaba 77 bad u Harvey Barnes ha ka minit shwa ban wai ka jingïalehkai.
Kane ka jingjop kaba heh, ka la pynlong ruh ïa ka Newcastle United ban don hajrong duh ka miej ïakheiñ point, watla ki dang don sa katto katne tylli ki jingïalehkai kaba kiwei pat ki club kim pat ïakhun.
Haba phai pat sha kawei ka jingïalehkai, ka Arsenal ka la hiar madan da kajuh ka thong bad jing-angnud kumba ka la leh ha ka aiom ba la lah, ha kaba ka la lah ban pynliem noh ïa ka Nottingham Forest da 2-1 kol.
Ha kane ka jingïalehkai, dei ka Arsenal kaba la khyrwit nyngkong ïa baroh ar tylli ki kol, kata lyngba u Eddie Nketiah ha ka minit ba 26 bad u Bukayo Saka ha ka minit ba 32, katba ïa ka shi kol ka Forest la thep da u Taiwo Awoniyi ha ka minit ba 83.
Ha kawei pat ka jingïalehkai, ka Brighton ka la lah ban pynliem noh ïa ka Luton kaba dang shu kiew kyrdan ha kane ka lympung, da 4-1 kol, ka jingïalehkai kaba la kham noh shiliang.
Ka Fulham ka la khur ïa ka jingjop ha kane ka sngi sdang, da kaba pynliem noh ïa ka Everton da 1-0 kol bad ïa kane ka kol la ïoh ban thep da u Bobby de Cordova-Reid ha ka minit kaba 73. Kumjuh ruh ka Crystal Palace ka la sdang da ka jingjop ha kane ka lympung, hadien ba ka la pynliem noh ïa ka Sheffield United da 1-0 kol bad ïa kane ka kol la thep da u Odsonne Edouard ha ka minit kaba 49.
Katba ka jingïalehkai hapdeng ka Bournemouth pyrshah ïa ka West Ham United ka la kut noh ha ka jingïakhaid da mar shi kol. Ïa ka kol jong ka West Ham la ïoh ban thep da u Jarrod Bowen ha ka minit ba 51 bad ïa ka kol pynïakhaid jong ka Bournemouth la ïoh ban thep da u Dominic Solanke ha ka minit kaba 82.