Shillong, Nailar 13
U rangïalehkai pdeng ka England u Jude Belling-ham u la ïoh ban khyrwit ïa ka kol kaba nyngkong ka jong u, hadien ba u la mihkhmat ha ka sien kaba nyngkong ïa ka Real Madrid ha ka aiom ba thymmai jong ka lympung La Liga ha Spain, ha kaba ka Real Madrid ka la jop ïa ka Athletic Bilbao.
Une u rangïalehkai ba dang 20 snem ka rta, uba la pynïasoh sha ka Real Madrid ha ka dor kaba kot sha ka £88.5m na ka Borussia Dortmund, u la ïoh ban khyrwit ïa ka kol kaba ar jong ka Real Madrid ha ka minit kaba 36.
U Bellingham un dei u rangïalehkai ba nyngkong ka England ban khyrwit kol ha ki lympung baheh na ka bynta ka Real Madrid ha ka jingïalehkai ba nyngkong, kata naduh u 2007 ba la khyrwit da u David Beckham.
Ha kane ka jingïalehkai ïa ka kol ba nyngkong la khyrwit da u Rodrygo ha ka minit ba 28, ha kaba ka Real Madrid ka la jop da 2-0 kol.
Ha shwa ban mih madan ha kane ka lympung, u Bellingham u la ïoh ruh ban ïalehkai ha baroh saw tylli ki jingïalehkai paralok jong ka Real Madrid, kaba long kum shi bynta ka jingpynkhreh ïa kane ka aiom ïalehkai, ha kaba u la khyrwit ruh ar tylli ki kol ha ka jingïakhun paralok pyrshah ïa ka Manchester United kaba la long ha Texas.
Lah ban pynkynmaw ba ka Real Madrid ha ka aiom ba la lah, ka la wan ha ka kyrdan kaba ar ha ka La Liga, kata ban don 10 point hadien jong ka Barcelona.
“U Bellingham u dei u khynnah uba tbit bha, u la lah ban pynpaw ka rukom ïalehkai kaba itynnad bad u long ruh uba trei shitom,” la ong u Coach ka Madrid u Carlo Ancelotti.
“Nga dap da ka jingkmen bad khmih lynti ba kum u rangïalehkai ba dang khynnah un nanglah ban kiew shaphrang katba ka por ka dang ïaid bad ban lah ban ïarap ruh ïa ka kynhun ban khur ki jingjop.
Ha kane ka sngi, ha kiwei pat ki jingïalehkai, ka Real Sociedad ka la ïakhaid noh da mar shi kol ha ka jingïakhun pyrshah ïa ka Girona bad kumjuh ruh ka jingïalehkai hapdeng ka Las Palmas pyrshah ïa ka Mallorca ka la kut noh ha ka jingïakhaid da mar shi kol.
